Երևանում պարգևատրել են ռուսաց լեզվի հանրապետական օլիմպիադայի հաղթողներին
Ռուսաց լեզվի հանրապետական օլիմպիադայի հաղթողները պարգևատրվեցին Հայաստանի մայրաքաղաքում, հայտնում է Երևանում Ռուսական տան մամուլի ծառայությունը։
«Վ. Բրյուսովի անվան պետական համալսարանում տեղի ունեցավ Վալերի Բրյուսովի խմբագրությամբ «Հայ պոեզիան հնագույն ժամանակներից մինչև մեր օրերը» հանրահայտ անթոլոգիայի հրատարակման 110-ամյակին նվիրված ռուսաց լեզվի հանրապետական ուսանողական օլիմպիադայի համար հաղթողների, մրցանակակիրների և մասնակիցների պարգևատրման հանդիսավոր արարողությունը»,- ասվում է հաղորդագրության մեջ։
Նշվում է, որ օլիմպիադան անցկացվել է ապրիլի 27-28-ը և միավորել ուսանողների Հայաստանի տարբեր մարզերից։
Արարողությունը տեղի է ունեցել Բանասերի օրը։ Համալսարանում հավաքվել էին ուսանողներ ՀՀ Տավուշի, Լոռու և Սյունիքի մարզերից, ինչպես նաև Երևանից։
ՀՀ-ում ՌԴ դեսպան Սերգեյ Կոպիրկինն ընդգծել է ռուսաց լեզվի մեծ պահանջարկը ԱՊՀ-ում և աշխարհում։ «Հայ երիտասարդների համար ռուսաց լեզվի իմացությունը զգալի մրցակցային առավելություն է։ Հայաստանում գնահատում և սիրում են ռուսաց լեզուն, ակտիվ կիրառում այն որպես միջէթնիկ և միջազգային հաղորդակցության գործիք», – հայտարարել է Կոպիրկինը։
Ողջույնի խոսքով հանդես է եկել համալսարանի ռեկտոր Դավիթ Գյուրջինյանը ՝ ընդգծելով յուրաքանչյուր ուսանողի մասնակցության առանձնահատուկ արժեքը։ «Օլիմպիադային մասնակցելու փաստն ինքնին արժանի է հարգանքի և արդեն իսկ հավասարազոր է հաղթանակի», – հայտարարել է նա։
Երևանում Ռուսական տան ղեկավար Վադիմ Ֆեֆիլովը նշել է օլիմպիադայի մասշտաբն ու նշանակալիությունը։ Նա հայտնել է, որ օլիմպիադան միավորել է 73 ուսանողի Հայաստանի 12 բուհերից` ինչպես մասնագիտական բանասիրական ուղղվածության, այնպես էլ ոչ մասնագիտական ֆակուլտետներից։
«Մեզ համար սրանք պարզապես թվեր չեն։ Սա ակադեմիական միջավայրում ռուսաց լեզվի պահանջարկի և մեր ընդհանուր մշակութային ժառանգության նկատմամբ երիտասարդների հետաքրքրության կարևոր ցուցանիշ է», – ասել է Ֆեֆիլովը։
Արարողության ժամանակ Ֆեֆիլովը օլիմպիադայի կազմակերպման և անցկացման գործում ունեցած նշանակալի ներդրման համար համալսարանի ռեկտորին շնորհակալագիր է հանձնել Երևանում գիտության և մշակույթի ռուսական կենտրոնի (ԳՄՌԿ, հայտնի է որպես Երևանում Ռուսական տուն) անունից։
Օլիմպիադան կազմակերպել էին ԳՄՌԿ-ն, Հայաստանում ռուսական և խորհրդային բուհերի շրջանավարտների ասոցիացիան և Բրյուսովի անվան պետական համալսարանը։
