Խաղաղության Նոբելյան մրցանակի դափնեկիրը մտադիր է կրկին առաջադրվել Վենեսուելայի նախագահի պաշտոնում
Վենեսուելայի ընդդիմության առաջնորդ և Խաղաղության Նոբելյան մրցանակի դափնեկիր Մարիա Կորինա Մաչադոն հայտարարել է, որ մտադիր է կրկին առաջադրվել Վենեսուելայի նախագահի պաշտոնում և հույս ունի մինչև 2026 թվականի վերջը վերադառնալ երկիր։
Այս մասին Մաչադոն հայտնել է Պանամայում՝ վենեսուելական ընդդիմության արտագաղթած ներկայացուցիչների հետ հանդիպման ժամանակ, տեղեկացնում է Associated Press-ը։
Նրա հայտարարությունը հնչել է Վաշինգտոնի՝ Վենեսուելայի նկատմամբ քաղաքականության կտրուկ փոփոխությունից մի քանի ամիս անց։
Նախկին նախագահ Նիկոլաս Մադուրոյի՝ ամերիկացի զինվորականների կողմից գերեվարվելուց հետո ԱՄՆ նախագահ Դոնալդ Թրամփի վարչակազմը փաստացի հրաժարվել է Մաչադոյին աջակցելուց և սկսել է համագործակցել Վենեսուելայի ժամանակավոր նախագահ Դելսի Ռոդրիգեսի հետ։
Մաչադոն անցյալ տարվա դեկտեմբերից գտնվում է արտասահմանում։ Մինչև այդ նա գրեթե մեկ տարի թաքնվում էր Վենեսուելայի տարածքում։ Ավելի ուշ քաղաքական գործիչը մեկնել է Նորվեգիա, որտեղ ստացել է Խաղաղության Նոբելյան մրցանակը։
Ըստ նրա, վենեսուելական ընդդիմությունը նախկինի պես ձգտում է անցկացնել «ազատ և արդար նախագահական ընտրություններ», որոնցում կկարողանան մասնակցել երկրի բոլոր քաղաքացիները, այդ թվում՝ արտերկրում բնակվողները։
Միևնույն ժամանակ, Վենեսուելայում նոր ընտրությունների ժամկետները դեռևս մնում են անորոշ։ Երկրի սահմանադրությունը պահանջում է ընտրություններ անցկացնել 30 օրվա ընթացքում այն բանից հետո, երբ նախագահը դառնում է «մշտապես անկարող իր պարտականությունները կատարելու», սակայն ԱՄՆ վարչակազմն ու Վենեսուելայի ժամանակավոր իշխանությունները գնալով ավելի հազվադեպ են անդրադառնում այս թեմային։
Մաչադոն հայտարարել է, որ իսկապես մրցակցային ընտրություններ կազմակերպելու համար կպահանջվի յոթից ինը ամսվա նախապատրաստություն։ Անհրաժեշտ պայմանների թվում նա նշել է չեզոք ընտրական մարմինների նշանակումը, ընտրողների ցուցակների թարմացումը և ընդդիմադիր թեկնածուների մասնակցության թույլտվությունը՝ առանց պետության կողմից ճնշման։
Քաղաքական գործիչը նաև հաստատել է, որ պատրաստ է անձամբ մասնակցել ապագա ընտրություններին։
«Ես թեկնածու եմ լինելու, սակայն կարող են լինել նաև այլ հավակնորդներ։ Ես կցանկանայի մասնակցել ընտրություններին բոլոր նրանց հետ միասին, ովքեր կցանկանան առաջադրվել», — հայտարարել է Մաչադոն։
