Իսրայելցի ազգայնականները «Մա՛հ արաբներին» վանկարկումներով քայլերթ են անցկացրել Երուսաղեմի Հին քաղաքում
Իսրայելցի ազգայնականները քայլերթով անցել են բռնազավթված Արևելյան Երուսաղեմի Հին քաղաքի նեղ փողոցներով՝ վանկարկելով «Մա՛հ արաբներին» և «Թող վառվեն ձեր գյուղերը»․ հայտնում է AFP-ն:
Ամենամյա «Երուսաղեմի օրվա» քայլերթը նվիրված է 1967 թվականին Արևելյան Երուսաղեմի գրավմանն ու անեքսիային, ինչը միջազգային իրավունքով անօրինական է համարվում:
Վերջին տարիներին սա հանգեցրել է բռնության բազմաթիվ բռնկումների, քանի որ ծայրահեղ աջակողմյան իսրայելցիները վանկարկում են սադրիչ կարգախոսներ ու վիրավորանքներ, ինչպես նաև ֆիզիկական հարձակումների են ենթարկում պաղեստինցիներին և լրագրողներին:
Մինչև կեսօր պաղեստինցի խանութպանների մեծ մասը Հին քաղաքում իջեցրել էր մետաղական փեղկերը և լքել քարե նրբանցքները:
Մի քանի խանութ բաց է մնացել «Կանգնած ենք միասին» (Standing Together) իսրայելա-պաղեստինյան զանգվածային շարժման ակտիվիստների պաշտպանության ներքո: Նրանք տեղակայվել էին ամբողջ Հին քաղաքում՝ փորձելով պաշտպանել պաղեստինցի բնակիչներին և ձեռնարկությունները հետապնդումներից ու հարձակումներից:
