Մեծ Բրիտանիան հերքել է Ռումինիայի հայտարարությունը ռուսաստանյան անօդաչուներ խոցելու վերաբերյալ
Բրիտանական ռազմաօդային ուժերի երկու Eurofighter Typhoon կործանիչներ շաբաթ օրը՝ ապրիլի 25-ի վաղ առավոտյան, օդ են բարձրացվել Ռումինիայի Բորչա ավիաբազայից՝ ռումինական սահմանի մոտ ռուսաստանյան անօդաչու թռչող սարքերի հարձակումների մասին հաղորդումներից հետո։ Մեծ Բրիտանիայի պաշտպանության նախարարությունը հայտարարել է, որ երկու ինքնաթիռներն էլ վերադարձել են բազա՝ առանց որևէ թիրախ խոցելու. հայտնում է UK Defence Journal-ը։
Ռումինիայի ազգային պաշտպանության նախարարությունը մամուլի հաղորդագրություն է տարածել, որում նշվում է, որ շաբաթ առավոտյան «ռուսաստանյան ուժերը վերսկսել են անօդաչուների հարձակումները Ուկրաինայի քաղաքացիական և ենթակառուցվածքային օբյեկտների վրա՝ Ռումինիայի հետ գետային սահմանի մոտ՝ Տուլչա շրջանում»։
Ռումինական ռադարները հայտնաբերել են Ռումինիայի օդային տարածքի մոտակայքում գործող անօդաչու սարքեր։ Բրիտանական ռազմաօդային ուժերի երկու Eurofighter Typhoon ինքնաթիռներ, որոնք ներգրավված են օդային հսկողության ուժեղացված առաքելության մեջ, ժամը 02:00-ին օդ են բարձրացվել Ֆետեշտիի 86-րդ ավիաբազայից։ Ռումինիայի պաշտպանության նախարարությունը հայտարարել է, որ «Թայֆունները» ռադարային կապ են հաստատել Ուկրաինայի տարածքում՝ Ռենիից 1,5 կիլոմետր հեռավորության վրա գտնվող թիրախի հետ, և որ «օդաչուներին թույլատրվել է ներգրավվել անօդաչուների դեմ», մինչդեռ ռումինական ցամաքային ռադարները հետևել են թիրախների խմբին Ռենիի տարածքում, որտեղ հաղորդվել է բազմաթիվ պայթյունների մասին։
Մեծ Բրիտանիայի պաշտպանության նախարարության զեկույցը ուղղակիորեն հակասում է սրան՝ նշելով, որ ինքնաթիռները չեն հարձակվել ռուսաստանյան որևէ օբյեկտի վրա, չեն ներխուժել Ուկրաինայի օդային տարածք, և որ լուրերը, թե «Թայֆունները» խոցել են ռուսաստանյան անօդաչուներ, սխալ են։
Ժամը 02:31-ին Գալացի բնակիչները արտակարգ իրավիճակների ծառայություններին հայտնել են Բարիերա Տրայան թաղամասում օբյեկտի ընկնելու մասին, որից հետո անօդաչուի բեկորներ են հայտնաբերվել տարածքի մի քանի վայրերում և արձանագրվել ռումինական ոստիկանության ու զինվորականների կողմից։ Նախնական գնահատականներով՝ վնասվել են տնտեսական շինություն և էլեկտրասյուն, տուժածների մասին տեղեկություններ չկան։
Ռումինիայի ազգային պաշտպանության նախարարությունը հայտարարել է, որ «խստորեն դատապարտում է Ռուսաստանի Դաշնության անպատասխանատու գործողությունները»՝ ընդգծելով, որ միջադեպը «նոր մարտահրավեր է տարածաշրջանային անվտանգությանն ու կայունությանը Սև ծովի շրջանում», և որ «նման միջադեպերը ցույց են տալիս Ռուսաստանի Դաշնության արհամարհանքը միջազգային իրավունքի նկատմամբ և վտանգում են ոչ միայն Ռումինիայի քաղաքացիների անվտանգությունը, այլև ՆԱՏՕ-ի կոլեկտիվ անվտանգությունը»։
