Արթուր Ալեքսանյանը ժամանակավորապես դադարեցնում է մրցելույթները
Անվանի ըմբիշ Արթուր Ալեքսանյանը ժամանակավորապես դադարեցնում է մրցելույթները, նա չի մասնակցի առաջիկա մրցաշարերին, այդ թվում՝ մոտեցող Եվրոպայի առաջնությանը:
Այս մասին Առաջին ալիքի եթերում տեղեկացրել է հունահռոմեական ոճի ըմբշամարտի Հայաստանի ազգային հավաքականի գլխավոր մարզիչ Արմեն Բաբալարյանը։
Մարզչի խոսքով՝ Ալեքսանյանն այժմ շարունակում է բուժումների գործընթացը, իսկ նրա փոխարեն 97 կգ քաշային կարգում մեր երկրի մարզական պատիվը կպաշտպանի աշխարհի Մ-23 չեմպիոն Հայկ Խլոյանը։
34-ամյա Արթուր Ալեքսանյանը Օլիմպիական խաղերի չեմպիոն է, կրկնակի արծաթե և բրոնզե մեդալակիր, աշխարհի քառակի ու Եվրոպայի յոթակի չեմպիոն։
