ԵՄ-ն չի հասկանում ԱՄՆ-ի նպատակներն Իրանում. Կալաս
Եվրոպական դիվանագիտության ղեկավար Կայա Կալասը հայտարարել է, որ Եվրամիությունը չի հասկանում ԱՄՆ-ի նպատակներն Իրանում և կարծում է, որ ուժի կիրառման համար իրավական հիմքը բացակայում է։ Այս մասին հաղորդում է «ՌԻԱ Նովոստի»-ն՝ վկայակոչելով լրագրողների հետ նրա զրույցը ԵՄ ղեկավարների գագաթնաժողովից առաջ։
«Խոսք է եղել այն մասին, թե կա արդյոք ցանկություն այս գործողությունն (խմբ․՝ «Վահաններ» գործողությունն՝ ուղղված Կարմիր ծովում նավագնացության անվտանգության ապահովմանը հութիների հարձակումներից) ընդլայնելու նաև Հորմուզի նեղուցում։ Նման ցանկություն չի եղել, քանի որ նախարարներն ասել են, որ իրենց հետ չեն խորհրդակցել: Ոմանք նույնիսկ ասել են, որ իրենք փորձել են համոզել կողմերին՝ չսկսել այդ պատերազմը, և մենք չգիտենք, թե որոնք են այս պատերազմի նպատակները։ Նաև բացակայում է ուժի կիրառման համար իրավական հիմքը միջազգային իրավունքում», – ասել է Կալասը։
Ավելի վաղ ԱՄՆ նախագահ Դոնալդ Թրամփը Չինաստանին, Ֆրանսիային, Ճապոնիային, Հարավային Կորեային, Մեծ Բրիտանիային և այլ երկրների կոչ էր արել նավեր ուղարկել Հորմուզի նեղուց՝ նավագնացությունը վերականգնելու համար։ Գերմանիան և Ֆրանսիան արդեն մերժումով են պատասխանել Թրամփի խնդրանքին։ Իր հերթին, եվրոպական դիվանագիտության ղեկավար Կայա Կալասը հայտարարել է, որ ԵՄ երկրները պատրաստ չեն նավատորմ ուղարկել Հորմուզի նեղուց։
