ՄԱԿ-ի Անվտանգության խորհուրդը Ծոցի երկրների վրա իրանական հարձակումները դատապարտող բանաձև է ընդունել
ՄԱԿ-ի Անվտանգության խորհուրդը ընդունել է Իրանի կողմից Պարսից ծոցի երկրների և Հորդանանի վրա հարձակումները դատապարտող բանաձևի նախագիծը՝ պահանջելով, որ Թեհրանը անհապաղ դադարեցնի ռազմական գործողությունները։
Ինչպես հաղորդում է AL Jazeera-ն, ՄԱԿ-ի Անվտանգության խորհրդի 15 անդամներից 13-ը մարտի 11-ին կողմն են քվեարկել Պարսից ծոցի համագործակցության խորհրդի կողմից առաջարկված և ՄԱԿ-ի անդամ 135 այլ պետությունների կողմից համահեղինակած բանաձևի օգտին։
Նախագծի դեմ ոչ մի երկիր չի քվեարկել։ Փոխարենը, Չինաստանն ու Ռուսաստանը ձեռնպահ են մնացել։
Բանաձևը դատապարտում է Իրանի հարձակումները և պահանջում անհապաղ դադարեցնել ռազմական գործողությունները, ինչպես նաև տարածաշրջանի ենթակառուցվածքների, մասնավորապես նավահանգիստների և էներգետիկ օբյեկտների թիրախավորումը։
Քվեարկությունից հետո ՄԱԿ-ում Իրանի դեսպան Ամիր-Սաիդ Իրավանին ելույթ է ունեցել խորհրդում՝ «խորը ափսոսանք» հայտնելով բանաձևի ընդունման կապակցությամբ։
«Այսօրվա գործողությունը Անվտանգության խորհրդի մանդատի ակնհայտ չարաշահում է», – նշել է նա՝ քննադատելով Միացյալ Նահանգներին «իրանական ժողովրդի դեմ բարբարոսական պատերազմի» և հակամարտությունը սկսելու, այդ թվում՝ Իրանի գերագույն առաջնորդ Ալի Խամենեիի սպանության համար։
ՄԱԿ-ում Ռուսաստանի դեսպան Վասիլի Նեբենզիան ընդգծել է, որ իր երկիրը ձեռնպահ է մնացել բանաձևի նախագծի քվեարկությունից, «քանի որ այն չափազանց անհավասարակշիռ էր» և չէր հասնելու «միջազգային խաղաղության և անվտանգության ապահովման նպատակին»։
«Մենք ցավում ենք այն իրավիճակի համար, որում հայտնվել են Մերձավոր Արևելքի երկրները։ Ավելին, մենք անընդունելի ենք համարում Պարսից ծոցի արաբական պետությունների քաղաքացիական ենթակառուցվածքներին հարվածելը», – ասել է Նեբենզիան։
ՄԱԿ-ում Չինաստանի դեսպան Չժան Ջունը ընդգծել է, որ հակամարտությունը «ոչ լեգիտիմություն ունի, ոչ էլ իրավական հիմք», և ԱՄՆ-ն ու Իսրայելը պետք է դադարեցնեն իրենց հարձակումները՝ տարածաշրջանային իրավիճակի հետագա վատթարացումը կանխելու համար։
