Տեսա՝ շատ բարձր տրամադրությամբ թմբուկ էիք խփում, բայց ուղիղ ասեք՝ Վրաստանում այս հարցը բարձրացրե՞լ եք. Դանիելյան
Մեր օրակարգի թե՛ տնտեսական, թե՛քաղաքական հարցերը քննարկել ենք վրաց գործընկերոջ հետ, այս մասին ԱԺ-Կառավարություն հարցուպատասխանի ժամանակ ասաց Նիկոլ Փաշինյանը՝ պատասխանելով ընդդիմադիր պատգամավոր Գառնիկ Դանիելյանի բարձրաձայնած խնդրին, որը վերաբերում է այն տնտեսական խնդիրներին, որին բախվում են հայ տնտեսվարողները հարևան Վրաստանում:
Նիկոլ Փաշինյանի խոսքով՝ քննարկել են բոլոր հարցերը, այդ թվում՝ տրանսպորտային և կոնկրետ պայմանավորվածություններ են ձեռք բերվել:
Գառնիկ Դանիելյանն արձագանքեց. «Դուք շատ բարձր տրամադրությամբ թմբուկ էիք խփում, ես նայեցի այդ դրվագները, շատ լավ է, բայց Վրաստանի իշխանություններին ասե՞լ եք, որ ՀՀ իշխանությունը խնդիր է տեսնում, որ վրացական կողմը կաշառք է պահանջում հայ բեռնափոխադրողից»:
Նիկոլ Փաշինյանն էլ, ի պատասխան ընդդիմադիր պատգամավորի դիտարկմանն, ասաց.
«Դուք ձեր սադրանքներով ուզում եք պրոբլեմ ստեղծել, որ հետո գաք այդ պրոբլեմների մասին խոսեք, հետո նոր սադրանքներ անեք: Դուք ոչ մի բան չեք կարող փոխանցել, որովհետև փոխանցելու ոչ մի բան չունեք: Կառավարությունն ապահովվում է Հայաստանից տրանսպորտային արտահանման և ներմուծման խնդիրները: Եթե դուք այլ ինֆորմացիա ունեք, իրավապահներին պետք է դիմեք: Եթե մինչև հիմա չեք դիմել, ուրեմն պարզ պրովակացիայով եք զբաղված»:
