Իրանում հայտնել են ավելի քան 3,8 հազար վայրերում ՀՕՊ տեղակայման մասին
Իրանի ամբողջ տարածքում հակաօդային պաշտպանության համակարգեր են տեղակայված ավելի քան 3,8 հազար կետերում, որոնցից շատերը գտնվում են դժվարամատչելի շրջաններում։ Այս մասին հայտնել է Իրանի բանակի հակաօդային պաշտպանության ուժերի համակարգողի տեղակալ, բրիգադի գեներալ Մոհամադ Սադեղիանը, հայտնել է Mehr-ը։
Նրա խոսքով՝ հակաօդային պաշտպանության հիմնական խնդիրները ներառում են օդային թիրախների հայտնաբերումը, հետախուզումը, որսումը և խոցումը։ Համակարգը կարող է հայտնաբերել թռչող սարքերը ոչ միայն Իրանի օդային տարածքում, այլև դրա սահմաններից դուրս, որից հետո կատարվում է դրանց նույնականացում, և անհրաժեշտության դեպքում որոշում է ընդունվում որսման վերաբերյալ։
Թիրախների ոչնչացման համար կարող են կիրառվել կործանիչներ, հրթիռներ և հակաօդային պաշտպանության այլ միջոցներ։ Գլխավոր խնդիրը, նշել է Սադեղիանը, թշնամու ինքնաթիռին հանձնարարված առաքելություն կատարել թույլ չտալն է, իսկ անհրաժեշտության դեպքում՝ այն ոչնչացնելը։
Գեներալն ընդգծել է, որ հակաօդային պաշտպանությունն աշխատում է ոչ միայն ռազմական հակամարտությունների ժամանակ։ Այն համակարգում է մարդատար ինքնաթիռների, ուղղաթիռների և այլ օդանավերի տեղաշարժը, ներառյալ փրկարարական և հումանիտար գործողություններում ներգրավված տեխնիկան։
Սադեղիանի խոսքով՝ հակաօդային պաշտպանության ստորաբաժանումները տեղակայված են անապատներում, ծովափին, կղզիներում և բարձրլեռնային շրջաններում։ Դիտարկման համակարգերը, օպտիկաէլեկտրոնային սարքավորումները, ռադարները և այլ ժամանակակից միջոցները հնարավորություն են տալիս շուրջօրյա վերահսկել Իրանի օդային տարածքը և հարակից շրջանները։
