Մակրոնը հրահանգել է ավելացնել միջուկային մարտագլխիկներն ու այլևս չհրապարակել դրանց թիվը
Ֆրանսիայի նախագահ Էմանուել Մակրոնը հայտարարել է միջուկային մարտագլխիկների ազգային զինանոցն ավելացնելու որոշման մասին։ Այս մասին նա հայտարարել է երկրի հյուսիս-արևմուտքում գտնվող Իլ Լոնգ սուզանավերի բազայում իր ելույթի ժամանակ։
Պետության ղեկավարի խոսքով՝ Ֆրանսիան նաև կդադարեցնի միջուկային զինանոցի քանակի վերաբերյալ տվյալների հրապարակումը։
«Իմ պատասխանատվությունն է ապահովել, որ մեր միջուկային զսպման ուժերը պահպանեն իրենց խոցելու ունակությունը։ Դա հատկապես կարևոր է ներկայիս վտանգավոր իրավիճակում»,-նշել է Մակրոնը։
Ֆրանսիայի նախագահը հայտնել է, որ ընթացիկ տարում իր երկիրը կսկսի ռազմավարական գերձայնային մանևրող հրթիռների արտադրության ծրագիրը, որոնք նախատեսված են կործանիչների և հեռանկարային ավիակիրների վրա տեղադրելու համար։
Մակրոնը պարզաբանել է, որ ներուժի հզորացման որոշման վրա ազդել են հակառակորդների մոտ սպառազինությունների զարգացման տեմպերը, նրանց միջև կոալիցիաների ձևավորման հավանականությունը, ինչպես նաև սպառազինությունների տարածման ռիսկերը։
