ԱՄՆ Գերագույն դատարանը որոշել է, որ Թրամփի սահմանած մաքսատուրքերը լիազորությունների գերազանցում են
ԱՄՆ Գերագույն դատարանը որոշել է, որ արտակարգ տնտեսական լիազորությունների մասին օրենքի (IEEPA) պատրվակով նախագահ Դոնալդ Թրամփի վարչակազմի սահմանած ներմուծման մաքսատուրքերը գերազանցում են նախագահի լիազորությունների շրջանակը։
Այսպիսով, դատարանը հաստատել է ստորին դատարանի որոշումը։ Վեց դատավոր քվեարկել է դատավճռի օգտին, իսկ երեքը՝ դեմ։
«Կառավարությունը արտակարգ տնտեսական լիազորությունների մասին օրենքը (IEEPA) մեկնաբանում է որպես նախագահին միակողմանիորեն անսահմանափակ մաքսատուրքեր սահմանելու և դրանք սեփական հայեցողությամբ փոփոխելու հնարավորություն։ Նման մեկնաբանությունը կնշանակեր մաքսատուրքային քաղաքականության նկատմամբ նախագահի լիազորությունների զգալի ընդլայնում»,- նշվում է դատարանի որոշման մեջ։
«Հատկանշական է, որ IEEPA-ի գոյության 50 տարիների ընթացքում ոչ մի նախագահ այն չի օգտագործել մաքսատուրքեր սահմանելու համար, առավել ևս նման մասշտաբով»։ Պատմական նախադեպի բացակայությունը, զուգորդված պետության ղեկավարի կողմից պահանջվող լիազորությունների լայն շրջանակի հետ, ցույց է տալիս, որ մաքսատուրքերը գերազանցում են նախագահի «օրինական լիազորությունները»,- նշվում է որոշման մեջ։
Միաժամանակ, Գերագույն դատարանը չի ճշտել՝ արդյոք վարչակազմը պե՞տք է վերադարձնի նախկինում հավաքված մաքսատուրքերը։
Հիշեցնենք, որ 2025 թվականի ապրիլի 2-ին Թրամփը հայտարարեց 185 երկրներից և տարածքներից ներմուծվող ապրանքների նկատմամբ սահմանված մաքսատուրքերի մասին: Օգոստոսի 29-ին Կոլումբիայի շրջանի վերաքննիչ դատարանը որոշեց, որ նախագահը լիազորություններ չունի իր հայտարարած մաքսատուրքերից շատերը սահմանելու համար: Սեպտեմբերի 4-ին ԱՄՆ վարչակազմը միջնորդություն ներկայացրեց Գերագույն դատարան՝ այդ որոշումը չեղյալ համարելու համար:
