Պակիստանում 11 զինվորական է զոհվել ահաբեկչության հետևանքով

Պակիստանի Խայբեր Պախտունխվայի նահանգում ահաբեկչական գործողության հետևանքով զոհվել է առնվազն 11 զինծառայող: Այս մասին հաղորդում է Dawn հրատարակությունը՝ հղում անելով Պակիստանի զինված ուժերի մամուլի ծառայությանը։

Խայբեր Պախտունխվայի նահանգի Բաջաուր շրջանի անցակետում ահաբեկչական գրոհն իրականացվել է ավտոմեքենայի մեջ տեղադրված պայթուցիկ սարքով։

Եվս յոթ մարդ, այդ թվում՝ կանայք և երեխաներ, վիրավորվել են։

Հաղորդագրության մեջ նշվում է, որ ահաբեկչությունը տեղի է ունեցել փետրվարի 16-ին։ Պակիստանի իշխանությունները կարծում են, որ դրա հետևում կանգնած են երկրում արգելված «Թեհրիկ-է-Թալիբան Պակիստան» շարժման կողմնակիցները։

Պատասխան կրակով ոչնչացվել է տասներկու ահաբեկիչ։

Հրատարակությունը նշում է, որ Խայբեր Պախտունխվայի նահանգում ահաբեկչական հարձակումների թվաքանակը վերջին տարվա ընթացքում աճել է։ Պակիստանի ուսումնասիրությունների և անվտանգության կենտրոնի տարեկան զեկույցի համաձայն՝ այս նահանգում անցյալ տարի գրանցվել է բռնության զգալի աճ. զոհերի թիվը 2024 թվականի 1620-ից աճել է՝ 2025 թվականին հասնելով 2331-ի։