Պենտագոնը Մերձավոր Արևելքում ունի ավելի քան 450 «Տոմահավկ» հրթիռներ. լրատվամիջոցներ
Պենտագոնը Մերձավոր Արևելքում ունի ավելի քան 450 «Տոմահավկ» հրթիռներ, որոնք կարող են օգտագործվել Իրանին հարվածելու համար, եթե ԱՄՆ նախագահ Դոնալդ Թրամփը կանաչ լույս տա, հաղորդում է NBC-ն՝ հղում անելով ամերիկացի պաշտոնյայի։
«Պենտագոնը նաև ավելի քան 450 «Տոմահավկ» ցամաքային հարձակման հրթիռներ ունի, որոնք տեղակայված են տարածաշրջանում (Մերձավոր Արևելքի – խմբ.) գտնվող նավերի վրա՝ զենքեր, որոնք պատրաստ են օգտագործվել ռեժիմի դեմ, եթե Թրամփը կանաչ լույս տա գործողությանը»,- հաղորդել է հեռուստաալիքը՝ հղում անելով ներկայանալ չցանկացած ամերիկացի պաշտոնյայի։
Ավելի վաղ ԱՄՆ նախագահ Դոնալդ Թրամփը հայտարարել էր, որ «հսկայական նավատորմ» է շարժվում դեպի Իրան և հույս էր հայտնել, որ Թեհրանը կհամաձայնվի «արդար և հավասար» գործարքի, որը կնշանակի միջուկային զենքի լիակատար վերացում: Ամերիկացի առաջնորդը հիշեցրել է, որ 2025 թվականի հունիսին ԱՄՆ-ն հարվածել է Իրանի միջուկային օբյեկտներին «Կեսգիշերային մուրճ» գործողության շրջանակներում: Նա հայտարարել է, որ «հաջորդ հարձակումն ավելի վատ կլինի» և կոչ է արել «թույլ չտալ, որ դա տեղի ունենա»:
