Թրամփը լավատեսություն է հայտնել Գազայի հատվածում հրադադարի վերաբերյալ
ԱՄՆ նախագահ Դոնալդ Թրամփը Օվալաձև աշխատասենյակում լրագրողների հետ հանդիպման ժամանակ լավատեսություն է հայտնել Գազայի հատվածում հրադադարի հաստատման վերաբերյալ, հաղորդում է NBC News-ը։
Հրադադարի մասին հարցին ի պատասխան՝ Թրամփն ասել է. «Կարծում եմ, որ այն կպահպանվի։ Այո՛, կարծում եմ, որ կպահպանվի։ Նրանք բոլորը հոգնել են ռազմական գործողություններից»։
Թրամփը նաև ասել է, որ ելույթ կունենա Իսրայելի Քնեսեթում և կայցելի Եգիպտոս։
Թրամփը մամուլի ասուլիսի ժամանակ նաև լավատեսություն է հայտնել Գազայի վերականգնման վերաբերյալ։
«Գազայի հատվածը կվերականգնվի և ինչպես գիտեք, այնտեղ կան մի քանի շատ հարուստ երկրներ և դա կպահանջի նրանց հարստության մի փոքր մասը, բայց ես կարծում եմ, որ նրանք ցանկանում են դա անել», – ասել է նա։
Հազարավոր մարդիկ հյուսիսային Գազա են տեղափոխվում՝ հրադադարի մասին հայտարարությունից հետո և շատերը ավերածությունների տեսարաններ կտեսնեն՝ Իսրայելի կողմից անկլավի դեմ իրականացված երկամյա ավերիչ ռմբակոծություններից հետո։
