Նախաստորագրումը մեզ մի քայլ մոտեցնում է խաղաղությանը, ինչը յուրաքանչյուր քաղաքացու համար ուրախալի է
«Հայաստանը ստանում է ապաշրջափակված ճանապարհներ մեր տարածքային ամբողջականության, սուվերենության պահպանմամբ, որը, կարծում եմ, շատ կարևոր է մեր պետության զարգացման տեսանկյունից»,- կառավարության հերթական նիստից հետո լրագրողների հետ զրույցում անդրադառնալով հայկական կողմի «ձեռքբերումներին»՝ նշեց ՏԿԵ նախարար Դավիթ Խուդաթյանը:
Առավել մանրամասնելու մասին հարցադրումներին ի պատասխան՝ ՔՊ-ական պաշտոնյան նկատեց, որ այս փուլի համար այնքան մեկնաբանություն և այնքան ինֆորմացիա, ինչքան նպատակահարմար է եղել փոխանցել, փոխանցվել է, և ինքն այս պահին դրան ավելացնելու ոչինչ չունի։
«Առաջիկայում կմեկնարկեն աշխատանքային պրոցեսներ, և այն պահից սկսած, երբ հավելյալ ինֆորմացիա փոխանցելու անհրաժեշտություն լինի, վստահաբար, կառավարությունն այդ ինֆորմացիան կփոխանցի»,- հավելեց նա։
Ըստ նրա՝ «խաղաղության պայմանագրի» նախաստորագրումը մեզ մի շատ մեծ քայլ մոտեցնում է խաղաղությանը։
«Սա, կարծում եմ, ՀՀ յուրաքանչյուր քաղաքացու համար սպասված և ուրախալի և կարևոր իրադարձություն է: Պիտի ասեմ, որ նախկինում այսպիսի մեկնաբանություններ էլի են հնչել խաղաղության պայմանագրի տեքստի մասով, երբ չարագուշակ մեկնաբանություններ էին արվում, իսկ տեքստի հրապարակումից հետո պարզվեց, որ այնտեղ ՀՀ-ի համար ոչ մի սարսափելի, ոչ մի ողբերգական և ոչ մի չարագուշակ բան չկար,- այսպես արձագանքեց Խուդաթյանը լրագրողի հարցին, թե՝ չե՞ք կարծում, որ ազնիվ չեք հանրության հետ, երբ միայն դրական լույսի ներքո եք ներկայացնում պայմանագիրը, ապա հավելեց,- Հայաստանի Հանրապետության համար բացվելու են այն ճանապարհները, որոնք անցնում են Ադրբեջանով, որովհետև ապաշրջափակումը երկկողմանի պրոցես է»։
Մանրամասները՝ տեսանյութում
