Նիկոլը Հայաստանի ինքնիշխան տարածքը դարձնում է վիճելի՝ Ալիևին թույլ տալով ստորագրել նման փաստաթղթի տակ․ Սուրեն Սուրենյանց
Պետք է վերլուծել, թե կողմերից յուրաքանչյուրն ինչ շահ ուներ վաշինգտոնյան գործարքը կնքելիս։ Սա Ալիևի և Թրամփի գործարքն էր, որտեղ Նիկոլ Փաշինյանը բուտաֆորիայի դեր էր կատարում։ Ադրբեջանն առնվազն վեց տեսանելի շահ է փաստաթղթավորել, հաստատ ստվերային այլ պայմանավորվածություններ էլ ունի։ Նախ, Ադրբեջանը կարողացավ ստանալ «Զանգեզուրի միջանցքը», համենայնդեպս՝ այն լեգիտիմացրեց միջազգային խոսույթի մակարդակում։ Իհարկե, ճկուն են, այլ անուններ կտան՝ TRIPP և այլն, դա մեր ականջը շոյելու համար է։ Սա շատ ավելի վատ կարգավորում է, քան նոյեմբերի 9-ի եռակողմ հայտարարության 9-րդ կետը։ 168TV-ի «#ՕրաԽնդիր» հաղորդման ժամանակ նման կարծիք հայտնեց «Դեմոկրատական այլընտրանք» կուսակցության նախագահ Սուրեն Սուրենյանցը։
«Երկրորդը, որը շատ ավելի սարսափելի է, այն է, որ Հայաստանի ինքնիշխան տարածքի մի հատվածին վերաբերող կարգավորումների տակ ստորագրել է նաև Ալիևը։ Չէ՞ որ այդ կետերը ներառված են հռչակագրում։ Սա նշանակում է, որ արևմտյան մամուլում տեղ գտած պնդումները հիմնազուրկ չեն, որ ինչ-որ կոնսորցիում պիտի ստեղծվի, որտեղ 30 տոկոս փայատերն էլ Ադրբեջանն է լինելու։ Անկախ նրանից, թե այդ միջանցքն ինչպիսի ճակատագիր կունենա, միջազգայնորեն լեգիտիմացվում է, որ Հայաստանի ինքնիշխան տարածքի մի հատվածը վիճելի տարածք է»,- ասաց ընդդիմադիր գործիչը:
«Երրորդը՝ վերջնականապես փակվեց Լեռնային Ղարաբաղի խնդիրը՝ որպես միջազգային հակամարտություն։ Խոսքը և՛ Մինսկի խմբի լուծարման, և՛ մեկ այլ դրվագի մասին է․ նոյեմբերի 9-ից հետո հայտնվեց մի նոր փաստաթուղթ, որում այլևս որևէ հիշատակում չկա Լեռնային Ղարաբաղի մասին։ Իսկ նոյեմբերի 9-ի փաստաթղթում Լեռնային Ղարաբաղի սուբյեկտությունը 3-4 պարամետրով հստակ ֆիքսված էր։
Չորրորդ՝ Ադրբեջանը կարողացավ հասնել նրան, որ 907-րդ բանաձևն ԱՄՆ-ը կասեցրեց։ Դրա կասեցման համար Ադրբեջանը 34 տարի կռիվ է տվել և անհաջողության է մատնվել, որովհետև Հայաստանի բոլոր երեք նախկին իշխանությունները հայկական լոբբիի հետ անընդհատ կանխել են այդ վտանգավոր սցենարը»,- նշեց քաղաքական գործիչը:
Սուրեն Սուրենյանցի կարծիքով՝ հինգերորդ վտանգավոր զարգացումը, որը դարձյալ այս այցի տրամաբանության մեջ է, «Էքսոն մոբայլի» և «Սոկարի» միջև նավթային խոշոր համաձայնագրի կնքումն էր. «Ռազմավարական առումով սա շատ ավելի կարևոր էր, քան մնացած բոլոր փաստաթղթերը, որոնք ավելի խորհրդանշական բնույթ ունեն։ Վեցերորդը, որը ոչ պակաս կարևոր է, այն է, որ Ադրբեջանի կողմից Հայաստանին պարտադրվող սահմանադրական փոփոխության պահանջը դարձավ միջազգային պահանջ։ Իլհամ Ալիևը շատ դիպուկ նկատեց, որ Հայաստանն այլևս չի կարող չկատարել այդ պահանջը, քանի որ դա անհարգալից վերաբերմունք կլինի ԱՄՆ-ի հանդեպ»:
«Հիմա նայենք, թե ինչ շահեց Հայաստանը։ Ընդամենը մի որոշ ժամանակով Հայաստանն աննշան թուլացրեց սուր էսկալացիայի վտանգը։ Մենք չենք էլ կարող որոշել այդ ժամանակը։ Երկրորդը՝ ստացավ քարոզչական խոստումներ ներդրումների, տրանսպորտային հաբ դառնալու մասին, որոնք որևէ երաշխիքով ամրապնդված չեն՝ ի տարբերություն TRIPP միջանցքի։ Հայաստանի շրջափակումը խորանալու է։ Որևէ մեկս պատկերացում չունի՝ ինչպե՞ս է կազմակերպվելու Իրան-Հայաստան հաղորդակցությունը։ Երբ ասում ենք, որ սա Ալիևի և Թրամփի գործարք է, պարզ է, որ այդտեղ երկու հիմնական թիրախ կա՝ Ռուսաստանի վրա ճնշումն ուժեղացնելը և Իրանը մեկուսացնելը»,- նշեց Սուրեն Սուրենյանցը:
Մանրամասները՝ տեսանյութում
