«Ռուսներին այստեղից հանողները թուրքերի հպատակներն են. ռուսին հանում են, որ թուրքին բերե՞ն». Վարդան Ղուկասյանը՝ 102-րդ ռազմաբազայի մոտ նախատեսված հավաքի մասին
ՀՀ անկախության հռչակագրի ընդունման օրը՝ օգոստոսի 23-ին, «Հանուն Հանրապետության» կուսակցության նախագահ Արման Բաբաջանյանը որոշել է բողոքի ակցիա իրականցնել Գյումրիում՝ ընդդեմ ռուսական 102-րդ ռազմաբազայի։
Ըստ նրա, այս ռազմաբազան վտանգ է Հայաստանի համար։
168.am-ը Գյումրու համայնքապետ Վարդան Ղուկասյանից հետաքրքրվեց՝ արդյոք տեղյա՞կ է այդ բողոքի ակցիայի մասին, ի՞նչ կարծիք ունի։
«Արման Բաբաջանյանն առհասարակ այս ազգի մեջ մեկ տոկոս չի կազմում։ Նա ի՞նչ իրավունք ունի՝ գա ռուսական բազայի դեմ բողոքի, որը պաշտպանում է ամբողջ հայ ժողովրդին, մեր սահմանները։ Այսինքն՝ ինքը թուրքի հպատակ է, հա՞։ Այսօր ռուսներին այստեղից հանողները թուրքերի հպատակներն են, թուրքահպատակ անձնավորություններ են, այսինքն՝ ռուսին հանում են, որ թուրքին բերե՞ն։
Ինքը մեծ ուժերի առաջ կկանգնի, չի կարող նման բան անել, որովհետև ամբողջ Գյումրին և հայ ազգի 70-80 տոկոսն իր հույսը կապում է Ռուսաստանի հետ»,- նշեց Վարդան Ղուկասյանը։
Ճշտող հարցին՝ Գյումրու համայնքապետարանը թույլ չի՞ տալու այդ հավաքը, Վարդան Ղուկասյանը պատասխանեց.
«Համայնքապետարանն այստեղ կապ չունի, ժողովրդի մասին է խոսքը, ժողովուրդը չի թողնի, որ նմանները կառավարեն Հայաստանի Հանրապետությունը, հասկանալի՞ է։ Իրենք չպետք է մեզ ասեն, թե մենք ում հետ մոտենանք, ում հետ՝ ոչ, իրենք պետք է հեռանան մեզանից։
Հարազատին դատի տվողին մենք կթողնե՞նք, որ գա այստեղ, միանշանակ ամբողջ ժողովուրդը դեմ է։ Եկեք պտտվեք ամբողջ Գյումրիում, Շիրակի դաշտավայրում և Հայաստանում՝ կտեսնեք, որ կասեն՝ ռուսական ռազմաբազան մեզ արդեն 70 տարուց ավելի պաշտպանում է՝ իր թերություններով հանդերձ»։
