ԱԱԾ-ն պետք է գնա Վահագն Խաչատուրյանի հետևից. Սուրեն Սուրենյանց
«Ադրբեջանը՝ որպես հաղթող կողմ, իրավացիորեն է հայտարարում «Զանգեզուրի միջանցքի» բացման անհրաժեշտության մասին։ Թյուրքական աշխարհին անհրաժեշտ է միջանցք ուղիղ հաղորդակցության համար, և այդ միջանցքը «Զանգեզուրի միջանցքն» է։ 1937 թվականից ի վեր առաջին անգամ կիրականացվի ուղիղ հաղորդակցություն Թուրքիայի, Ադրբեջանի և թյուրքական աշխարհի միջև»,- օրերս ասել է Ադրբեջանում Թուրքիայի դեսպան Բիրոլ Ակգյունը։
Նշենք, որ Բաքվում Թուրքիայի դեսպանի միտքն օրերս կրկնել էր Հայաստանի նախագահ Վահագն Խաչատուրյանը, որը Սյունիք կատարած եռօրյա այցի ընթացքում նույնպես խոսել է Սյունիքով միջանցքի բացման անհրաժեշտության մասին։
«Սյունիքը Հայաստանի զարգացման դարպասն է դառնալու հետագա զարգացման համար: Եթե մենք կարողանում ենք դարպասները բացենք Սյունիքի, ես նկատի ունեմ 43 կիլոմետրի հնարավորությունները, ուրեմն իսկապես վստահ եղեք, որ ապագան զարգացման առումով շատ մեծ հնարավորություններ է տալու մեզ»,- նշել է Խաչատուրյանը:
168TV-ի «Ռեվյու» հաղորդաշարի եթերում «Դեմոկրատական այլընտրանք» կուսակցության նախագահ Սուրեն Սուրենյանցը, խոսելով Վահագն Խաչատուրյանի և Բաքվում Թուրքիայի դեսպանի հայտարարությունների նույնականության մասին, ընդգծեց՝ դրանից հետո Հայաստանի Ազգային անվտանգության ծառայությունը պետք է գնար Խաչատուրյանի հետևից։
«ԱԱԾ-ն և՛ Վահագն Խաչատուրյանի, և՛ Նիկոլ Փաշինյանի հետևից պետք է գնա. նրանք արդեն կալանավորված պետք է լինեին։ Սյունիքում արած Խաչատուրյանի հայտարարությունը հակապետական հայտարարություն է, որը նաև Սահմանադրական կարգի տապալման մասին է։ Վահագն Խաչատուրյանը դարձել Ադրբեջանի դեսպանը՝ Հայաստանում»,- ասաց Սուրեն Սուրենյանցը։
Նրա խոսքով՝ չնայած Վահագն Խաչատուրյանի հայտարարությունը խիստ վտանգավոր է, սակայն տարօրինակ է, որ ընդդիմությունը՝ առավելապես խորհրդարանականը, դրան չի կարողանում համարժեք արձագանքել։
«Ստացվում է՝ Փաշինյանը չկա, օրակարգ էլ չկա»,- ասաց նա։
Հարցազրույցի մանրամասները՝ տեսանյութում։
