Արամ Առաջինը պետք է գա Հայաստան, Հռոմի պապը, ՌԴ հոգևոր առաջնորդը պետք է արձագանքեն. սա քրիստոնեության դեմ պայքար է. Գրիգոր Գրիգորյան

«Ղարաբաղյան պատերազմի վետերանների միություն» հասարակական կազմակերպության նախագահ, պահեստազորի գնդապետ Գրիգոր Գրիգորյանը 168.am-ի հետ զրույցում բազմիցս ասել է, որ պետք է հնչեցվեն Հայաստանի բոլոր եկեղեցիների զանգերը: Ըստ էության, հունիսի 27-ին, երբ ուժայինները մտան Մայր աթոռ, եկեղեցու զանգերն, ի վերջո, ղողանջեցին:

Բայց դրանից հետո Նիկոլ Փաշինյանն արդեն հայտարարեց, որ Վեհափառի և Եկեղեցու դեմ «ազատագրական» շարժումն անձամբ է առաջնորդելու։ Ավելին՝ նա իր համախոհներին կոչ արեց՝ «պատրաստվեք Մեծ հոգևոր հանդիպման Էջմիածնի կենտրոնական հրապարակում»:

Ըստ այդմ՝ 168.am-ը պահեստազորի գնդապետից հետաքրքրվեց՝ այդ դեպքում ի՞նչ պիտի անեն Հայ Առաքելական եկեղեցին, հասարակությունը, ընդդիմությունը:

«Նախ Եկեղեցու զանգերի մասով նշեմ՝ ես այն կարծիքին եմ, որ Եկեղեցու զանգերը պետք է հնչեին դեռ 2024 թվականի մայիսի 9-ին, երբ Բագրատ Սրբազանը Տավուշից Երևան էր գալիս: Բայց սա այլ թեմա է: Իսկ այսօր աշխարհի հայ եկեղեցականները պետք է գան Հայաստան՝ Արամ Առաջին կաթողիկոսից սկսած, և ինչ-որ բան ձեռնարկվի, որպեսզի ժողովուրդը ոտքի կանգնի: Այն, ինչ կատարվում է, ցավալի է:

Այս մարդիկ բառացի ասում են՝ ինչ են անում, ուր են տանում երկիրը, ոնց են կործանելու, բայց ժողովուրդը դեռ լուրջ չի ընդունում սա: Կրկնում եմ, աշխարհի բոլոր հայկական եկեղեցիների հոգևորականները, Արամ Առաջինը պետք է գան Հայաստան: Վատ չէր լինի, եթե տեղի ունեցողին արձագանքեին Հռոմի պապը, Ռուսաստանի հոգևոր առաջնորդը: Այսինքն, քրիստոնյա աշխարհը պիտի արձագանքի, քանի որ սա ոչ միայն հայկական եկեղեցու խնդիրն է, այլև քրիստոնեության դեմ պայքար է, որը ղեկավարում է Թուրքիայի նախագահ Էրդողանն իր ողջ ցինիզմով»,- նշեց Գրիգոր Գրիգորյանը:

Հավելենք, որ վերջերս Արամ Առաջին կաթողիկոսն ուղերձ էր տարածել, որտեղ նշում է.

«Շուրջ վեց տարիներէ ի վեր, դժբախտաբար, Հայրենիք չեմ այցելած։ Վերջին օրերուն մտածեցի, շա՜տ մտածեցի, Հայաստան գալու մասին, որպէսզի կարենամ օժանդակել ստեղծուած փոթորիկը նուազագոյնը հանդարտեցնելու ուղղութեամբ։ Սակայն, Ազգային Ժողովէն ու ընկերային ցանցերու ճամբով եւ այլապէս կատարուած ու շարունակուող անմակարդակ, մեր բարոյական, հոգեւոր ու ազգային արժէքներուն խոտոր համեմատող արտայայտութիւնները, ինչպէս նաեւ կատարուող ձերբակալութիւնները չեն քաջալերեր զիս քայլերս ուղղելու դէպի Հայրենիք։

Սակայն, կը մնամ միշտ յանձնառու, որևէ ժամանակ գալու Հայրենիք և Գարեգին Բ. Ամենայն Հայոց Կաթողիկոսին, Հայաստանի վարչապետ Նիկոլ Փաշինեանին ու այլ պատասխանատուներու հետ խորհրդակցելու, որպէսզի կարելի ըլլայ ստեղծուած ծանր իրավիճակէն Հայաստանը դուրս բերելու յարմարագոյն լուծումներ որոնել»:

Իսկ Մայր Աթոռը հուլիսի 21-ին հերթական հայտարարությունն էր տարածել, որտեղ իշխող քաղաքական ուժին հորդորում է դադարեցնել հակաեկեղեցական, անօրինական արշավը և լծվել երկրի առջև ծառացած լրջագույն հիմնախնդիրների հաղթահարմանը։

Միաժամանակ, Մայր Աթոռը դիմել է պետության իրավասու մարմիններին և պաշտոնյաներին՝ կոչ անելով ձեռնարկել բոլոր անհրաժեշտ և օրինական միջոցները՝ կանխարգելելու հակաօրինական այս միջոցառումը։