Բրունեյի սուլթանը հոգնածության պատճառով հայտնվել է Կուալա Լումպուրի հիվանդանոցում
Բրունեյի սուլթան Հասանալ Բոլքիահը մայիսի 27-ին հոսպիտալացվել է Մալայզիայի մայրաքաղաք Կուալա Լումպուրի Սրտի ազգային ինստիտուտ՝ հոգնածության պատճառով։
France24 պարբերականը նշում է, որ այս տեղեկությունը հաստատել է Մալայզիայի վարչապետը։Սուլթանը Հարավարևելյան Ասիայի պետությունների ասոցիացիայի (ASEAN) այլ ղեկավարների հետ Կուալա Լումպուրում էր ԱՍԵԱՆ-ի գագաթնաժողովի, ինչպես նաև Չինաստանի վարչապետ Լի Ցզյանի և Պարսից ծոցի համագործակցության խորհրդի բարձրաստիճան պաշտոնյաների հետ հանդիպման համար:
«Նա մի քիչ հոգնած է, այնպես որ, հանգստանում է Սրտի ազգային ինստիտուտում», – մամուլի ասուլիսում ասել է Մալայզիայի վարչապետ Անվար Իբրահիմը՝ պատասխանելով սուլթանի հոսպիտալացման հետ կապված հարցին։
Հիվանդանոցից հայտնել են, որ չեն կարող մեկնաբանել իրավիճակը, սակայն Մալայզիայի կառավարության մի աղբյուր ավելի վաղ AFP-ին հաստատել էր սուլթանի հոսպիտալացման մասին լուրը։
78-ամյա սուլթան Հասանալը գահ է բարձրացել 1967 թվականին։ Նա աշխարհի ամենաերկար կառավարող միապետն է և մոլորակի ամենահարուստ մարդկանցից մեկը:
