Թրամփը հայտարարել է, որ ԱՄՆ-ն մեծ քանակությամբ հիպերձայնային հրթիռներ է արտադրում
Միացյալ Նահանգներն ավարտել է հիպերձայնային զենքի մշակումը և այժմ այն արտադրում է մեծ քանակությամբ։ Այս մասին հայտարարել է ԱՄՆ նախագահ Դոնալդ Թրամփը։
«Մենք մշակել ենք դրանք (հիպերձայնային հրթիռներ ), և հիմա մենք արտադրում ենք դրանք, և մեծ քանակությամբ», – ասել է ամերիկացի առաջնորդը՝ ելույթ ունենալով Վեսթ Փոյնթում (Նյու Յորք նահանգ) ԱՄՆ ռազմական ակադեմիայի շրջանավարտների առջև։ Թրամփը որևէ մանրամասներ չի հայտնել։
Նա կրկնել է իր պնդումը, որ Ռուսաստանը իր հիպերձայնային զենքը մշակել է ԱՄՆ 44-րդ նախագահ Բարաք Օբամայի վարչակազմից անհրաժեշտ տեղեկատվությունը ստանալուց հետո։
Պենտագոնի պաշտոնյաները նախկինում ընդունել էին, որ Միացյալ Նահանգները հիպերձայնային զենքի արտադրության հարցում հետ են մնացել Ռուսաստանից և Չինաստանից։ ԱՄՆ պաշտպանության փոխնախարար Սթիվեն Ֆեյնբերգը հայտարարել է, որ երկրի միջուկային զենքը հնացած է, և որ Վաշինգտոնի ամենակարևոր խնդիրը դրա արդիականացումն ու հիպերձայնային համակարգերի մշակումն է։
