30 տոննա բենզինի կտրոն, կառույցի մի ամսվա պարգևավճար. Ինչու է ձերբակալվել Արմեն Դանիելյանը
Դեռևս նախորդ տարվա նոյեմբերի սկզբին, երբ դեռ Արմեն Դանիելյանը չէր նշանակվել Սննդամթերքի անվտանգության տեսչական մարմնի (ՍԱՏՄ) ղեկավար, 168.am-ը գրել էր, որ դա ռիսկային նշանակում է, և, որ այդ նշանակումը, ի վերջո, կարող է ունենալ քրեաիրավական հետևանքներ:
Մեր կանխատեսումն իրականացավ, և Արմեն Դանիելյանը նախ օրեր առաջ առանց պատճառը հայտնելու՝ ազատվեց ՍԱՏՄ ղեկավարի պաշտոնից, իսկ այսօր արդեն հայտնի դարձավ, որ ձերբակալվել է Հակակոռուպցիոն կոմիտեի աշխատակիցների կողմից:
Հակակոռուպցիոն կոմիտեից 168.am-ը տեղեկացավ, որ ՍԱՏՄ նախկին ղեկավարը ձերբակալվել է ծառայողական լիազորություններն օգտագործելով առանձնապես խոշոր չափերի գույք հափշտակելու մեղադրանքով։ Նրա նկատմամբ կալանքը որպես խափանման միջոց կիրառելու միջնորդություն է ներկայացվել դատարան:
ՍԱՏՄ մեր աղբյուրները տեղեկացրեցին, որ Արմեն Դանիելյանին Հակակոռուպցիոն կոմիտեն ձերբակալել է երկու պատճառով՝ նախ՝ նա նախորդ տարվա դեկտեմբեր ամսվա ՍԱՏՄ աշխատակիցների պարգևավճարներն է յուրացրել, և բացի դրանից, մեկ տարվա 30 տոննա բենզինի կտրոնները նախ բաժանել է ըստ կարիքի, ապա՝ հավաքել ու վաճառել:
