Դանիել Նոբոան վերընտրվել է Էկվադորի նախագահի պաշտոնում
Էկվադորի Ազգային ընտրական խորհուրդը գործող նախագահ Դանիել Նոբոային ճանաչել է երկրում կայացած նախագահական ընտրությունների երկրորդ փուլի հաղթող։
«Մենք Էկվադորի ժողովրդին հայտնում ենք, որ արձանագրությունների 90%-ի մշակումից հետո անշրջելի միտում է ի հայտ եկել նախագահական ընտրությունների երկրորդ փուլի արդյունքներում: Ազգային ընտրական խորհուրդը նախագահի և փոխնախագահի թեկնածուների հաղթողներ է համարում «Ազգային դեմոկրատական շարժում» կուսակցությունից Դանիել Նոբոային և Մարիա Խոսե Պինտոյին»,- մամուլի ասուլիսում ասել է ընտրական խորհրդի ղեկավար Դիանա Ատամաինտը։
Ավելի վաղ ընտրություններում Նոբոայի մրցակից Լուիսա Գոնսալեսը հրաժարվել էր ընդունել իր պարտությունը և կոչ էր արել վերահաշվարկել ձայները։
Արձանագրությունների 92,64%-ի մշակումից հետո Նոբոայի օգտին քվեարկել է ընտրողների 55,88%-ը, իսկ Գոնսալեսի օգտին՝ 44,12%-ը։ Թեկնածուների միջև տարբերությունը կազմում է ավելի քան 1,1 միլիոն ձայն։
