Թրամփը հայտարարել է, որ բանակցություններ է վարում TikTok-ը գնելու շուրջ
ԱՄՆ նախագահ Դոնալդ Թրամփը շաբաթ օրը հայտարարել է, որ մի քանի մարդու հետ բանակցություններ է վարում TikTok-ը գնելու շուրջ և, հավանաբար, առաջիկա 30 օրվա ընթացքում որոշում կկայացնի հայտնի հավելվածի ապագայի վերաբերյալ, հայտնում է Reuters-ը։
«Ես շատերի հետ եմ խոսել TikTok-ի մասին, և մեծ հետաքրքրություն կա TikTok-ի նկատմամբ»,- լրագրողներին է ասել Թրամփը Air Force One ինքնաթիռում Ֆլորիդա թռիչքի ժամանակ:
Reuters-ն ավելի վաղ հայտնել էր, որ քննարկումներին ծանոթ երկու անձ հայտարարել են, որ Թրամփի վարչակազմն աշխատում է TikTok-ին փրկելու ծրագրի վրա, որը ենթադրում է Oracle ծրագրային ապահովման ընկերության և արտաքին ներդրողների խմբի ներգրավում՝ հավելվածը արդյունավետորեն վերահսկելու համար:
Գործարքի պայմանների համաձայն, որը բանակցում է Սպիտակ տունը, TikTok-ի չինացի սեփականատեր ByteDance ընկերությունը կպահպանի ընկերության մասնաբաժինը, սակայն տվյալների հավաքագրումն ու ծրագրային ապահովման թարմացումները կիրականացնի Oracle-ը, որն արդեն ապահովում է TikTok-ի վեբ ենթակառուցվածքի հիմքը:
