Որոշ երկրներ հետաքրքրությամբ կամ դժգոհությամբ են հետևում Վրաստանի ու Ադրբեջանի հարաբերությունների ամրապնդմանը․ Գիվի Միկանաձե
Շատ երկրներ հետաքրքրությամբ հետևում են, թե ինչպես են Վրաստանն ու Ադրբեջանը ամրապնդում հարաբերությունները միմյանց հետ։ Այս մասին Sputnik Грузия-ի փոխանցմամբ, հայտարարել է Վրաստանի խորհրդարանի անդամ Գիվի Միկանաձեն։
«Որոշ մարդիկ դժգոհությամբ և նախանձով են նայում դրան, բայց դա նրանց գործն է, մենք գիտենք, որ պատմության մեջ կային կայսրություններ, որոնք գրավել են աշխարհի կեսը, կառավարել են հսկայական տարածքներ և ժողովուրդներ, բայց այսօր դրանք չես գտնի աշխարհի քարտեզներում,իսկ փոքր երկրներն ու ժողովուրդները կարողացել են գոյատևել և պահպանել մեր անկախությունը, քանի որ մենք միշտ դիմել ենք մեր ինքնությունը սատարող արժեքներին ու ավանդույթներին»,- ասաց նա։
Նրա խոսքով, նույնիսկ եվրոպական երկրներում աճող ժողովրդականություն են ձեռք բերում աջ ուժերը, որոնք առաջին հերթին ուղղված են ազգային առաջնահերթություններին աջակցելուն և ինքնորոշմանը։
