«Հելեն» փոթորիկը ԱՄՆ-ում 3 մարդու կյանք է խլել, մի շարք նահանգներում արտակարգ դրություն է հայտարարվել
«Հելեն» փոթորիկը Մեքսիկայի ծոցից հասել է ԱՄՆ Ֆլորիդայի նահանգի հյուսիս-արևմուտք որպես 4-րդ կատեգորիայի փոթորիկ։ Փոթորիկի հետ կապված արդեն առնվազն 3 մահ է արձանագրվել։ Այս մասին հաղորդում է The Associated Press գործակալությունը։
Մայամիի փոթորիկների ազգային կենտրոնի տվյալներով՝ «Հելեն»-ի քամիների արագությունը հասել է 225 կմ/ժամի։
Փոթորկի պատճառով ավելի քան 1,2 միլիոն տուն և բիզնես Ֆլորիդայում, 190 000 Ջորջիայում և ավելի քան 30 000 Հյուսիսային և Հարավային Կարոլինայում մնացել են առանց էլեկտրականության։ Նշված նահանգներում, ինչպես նաև Ալաբամայում և Վիրջինիայում արտակարգ դրության ռեժիմ է հայտարարվել։ The Associated Press-ը նշում է, որ 1 մարդ մահացել է Ֆլորիդայում, երբ նրա մեքենայի վրա է ընկել ճանապարհային նշան, ևս 2-ը մահացել են Ջորջիայում՝ հնարավոր պտտահողմից։
«Հելեն»-ը սեպտեմբերի 25-ին մոլեգնում էր Մեքսիկայի Յուկատանի թերակղզում՝ հեղեղելով փողոցները, ծառեր տապալելով։ Կուբայի արևմուտքում փոթորկի պատճառով տեղի են ունեցել էլեկտրամատակարարման խափանումներ։
