Էմիլ Սարգսյանը Վրաստանում FORT BOYARD է հիմնադրել
Թբիլիսիից Էմիլ Սարգսյանը Վրաստանի մայրաքաղաքում այդպես կոչված FORT BOYARD է հիմնադրել։ Նա նախաձեռնել է զվարճանքի տարածք մեծահասակների համար, որտեղ մարդիկ օգտագործելով իրենց ինտելեկտուալ և տրամաբանական հմտությունները, կարող են զվարճանալ։ Էմիլ Սարգսյանն իր նախաձեռնությունը անվանել է TTE ROOMS (TIME TO ESCAPE ROOMS)։ Այս մասին գրում է aliq.ge-ն։
Էմիլ Սարգսյանը մասնագիտությամբ միջազգային հարաբերությունների փորձագետ է, պետական կառավարման մագիստրոս։ Նշում է, որ միևնույն ժամանակ միշտ հետաքրքրվել է բիզնեսով՝ երազելով բիզնեսը համատեղել մասնագիտական գործունեության հետ։
Իր նախաձեռնության մասին պատմելիս նշում է, որ միտքն առաջացել է իր մոտ 20 տարեկանում՝ ցանկացել է ստեղծել այսպես կոչված փախուստի սենյակ (շատերին հայտնի է որպես ESCAPE ROOM, FORT BOYARD):
«TTE ROOMS ընկերությունը գործում է արդեն 3,5 տարի, այս ընթացքում բավականին շատ հավատարիմ հաճախորդներ է ձեռք բերել։ Սա վայր է, որտեղ մարդիկ խաղեր են խաղում, կատարելով տարբեր տրամաբանական առաջադրանքներ, լուծում հանելուկներ և նույնիսկ կատարում են ֆիզիկական առաջադրանքներ 1,5 ժամվա ընթացքում՝ կտրվելով իրականությունից:
Ցավոք, Վրաստանում մեծահասակների համար շատ ժամանցի վայրեր չկան։ Ավելի հաճախ ժամանցի տարածքներ են ստեղծվում երեխաների և դեռահասների համար։ Հետևաբար, իմ նպատակն էր ստեղծել մի վայր, որտեղ հասուն մարդիկ կարող էին զվարճանալ և միասին ժամանակ անցկացնել առանց ալկոհոլի, ուտելիքի և պարային երաժշտության», — պատմում է Սարգսյանը։
Նա նշում է, որ խաղերը, որոնք այս վայրում խաղում են մեծահասակները եզակի են, քանի որ դրա յուրաքանչյուր հատվածը՝ պատմությունը, առաջադրանքները և դեկորացիան ստեղծվել են անձամբ իր կողմից և բոլորովին տարբերվում են այլ հայտնի խաղերից։
«2021 թվականը համաճարակային շրջան էր, և իմ բիզնեսի ստեղծումը համընկավ այդ ժամանակահատվածի հետ։ Բավականին շատ դժվարությունների հանդիպեցի, տարբեր սահմանափակումների ու կանոնակարգերի պատճառով ժամանցի ոլորտը ժամանակավորապես դուրս մնաց մեր առօրյայից։ Ես, սակայն, չհանձնվեցի, ինչն ինձ թուլացնում է, հետո շատ ավելի ուժեղ է դարձնում։ Ես միշտ հավատում եմ հաղթանակին և գիտեմ, որ լավագույնը դեռ առջևում է»,- նշեց նա։
Էմիլ Սարգսյանը նշում է, որ իր նպատակն է առաջարկել իր նախաձեռնությունը ավելի շատ հաճախորդների Թբիլիսի այլ անկյուններում ևս․ «իմ բիզնեսն այժմ զարգացման ճանապարհին է»,- ասում է նա։
