ԱԺ ամառային սրճարան-ճաշարանն ուժի մե՞ջ է. ԱԺ-ն 11 միլիոն 500.000 դրամով ամառային սրճարանի տաղավար է պատվիրել
Իշխանությունները չեն նահանջում նախորդ տարվանից հղացած ամառային արճարան-ճաշարանի գաղափարից։ Թերևս ՀՀ հպարտ քաղաքացիների հոգսն իրենց ուսերին առած իշխանավորները չեն ցանկանում ժամանցը կազմակերպելու առիթը բաց թողնել անգամ աշխատավայրում։
Այսպիսով, տեղեկացանք, որ Ազգային ժողովը վերջերս կնքված պայմանագրով իր կարիքների համար ամառային սրճարանի տաղավարի (բար) ձեռքբերում է պատվիրակել «Արմպրոդուկտ» ՍՊԸ-ից։ Էլեկտրոնային աճուրդ գնման ընթացակարգով այս գնումն արժեցել է 11 միլիոն 500 հազար դրամ։
Իհարկե, Ազգային ժողովի տարածքում բացօթյա սրճարան կառուցելու համար տաղավարի գնմանը նախորդել են նաև բյուջեից գումար պահանջող այլ աշխատանքներ ևս, որոնց կանդրադառնանք առանձին հրապարակմամբ։
Դեռ նախորդ տարի էր մամուլը տեղեկացրել՝ ԱԺ նախագահ Ալեն Սիմոնյանը հանձնարարել է, որ մինչեւ ԱԺ նոր նստաշրջանի մեկնարկը՝ սեպտեմբերը, սրճարանն արդեն պատրաստ լինի, սակայն սրճարանի կառուցման աշխատանքները ձգձգվել էին շինկազմակերպության հետ կնքած պայմանագրի միակողմանի լուծարման պատճառով, քանի որ ԱԺ-ն բախվել էր մրցույթը շահած ընկերության անբարեխիղճ աշխատանքի ու ժամկետների խախտման հետ։
Ի դեպ, դեռ պարզ չէ, թե որ ընկերությունն ու ինչ պայմաններով է շահագործելու կառուցվող ճաշարանը։
