«Երկրում առկա գաղթականների խնդրի գլխավոր պատասխանատուն անձամբ Էրդողանն է». ԺՀԿ խոսնակ
Թուրքիայում գլխավոր ընդդիմադիր ուժ համարվող «Ժողովրդահնարապետական կուսակցության» (ԺՀԿ-CHP) խոսնակ Դենիզ Յուջելը խոսել է վերջին օրերին թուրք-սիրիական ազգամիջյան բախումներից:
Նա, անդրադառնալով Թուրքիայում ապրող փախստականների խնդրին, Թուրքիայի նախագահ Ռեջեփ Թայիփ Էրդողանին համարել է այդ խնդրի գլխավոր և անձամբ պատասխանատու անձ:
«Կայսերիում սկսված և մեր այլ նահանգներ թափանցած դաժան դեպքերի պատասխանատուն իշխանությունն է»,- ըստ ermenihaber.am-ի՝ ասել է նա:
Հիշեցնենք, որ հունիսի 30-ից ի վեր թե՛ Թուրքիայում և թե՛ Սիրիայում ազգամիջյան բախումներ են:
Ամեն ինչ սկսվել էր այն պնդումների տարածումից, որոնց համաձայն՝ Թուրքիայի կենտրոնական Կայսերի նահանգում ծագումով սիրիացի տղամարդը սեռական ոտնձգություն էր իրականացրել 7 տարեկան երեխայի նկատմամբ:
Դեպքին հաջորդել էին թուրքերի կողմից սիրիացիներին պատկանող մեքենաների և աշխատավայրերի վրա հարձակումները:
