Սա հրահանգ է Դատախազությանը. նկարիչներին էլ թող աքսորեն Հայաստանից պրծնի-գնա. Հաղթանակ Շահումյան

Քանդակագործ Հաղթանակ Շահումյանի գնահատմամբ՝ մշակութային միջավայրն այսօր դարձել է  խոցելի, և տպավորություն է, որ ամեն մի նորամուծություն փորձարկվում է  հենց այդ միջավայրի վրա։

«Ոչ միայն այս շենքը, այլև սալոններ, 4-5 կոմբինատներ, բոլորը եղել են Նկարիչների միության սեփականությունը, չեն եղել որևէ նախարարության կազմում։ Տարօրինակ է, որ ձևակերպումները բոլոր միությունների համար արել են նույն ձևով, և այսօր խոսք է գնում ընդամենը երկու միությունների մասին, այն դեպքում, երբ դրանք ամենախոցելին պետք է լինեին։ Միտում եմ տեսնում, որպեսզի մասնատեն։ Սա Դատախազության ձեռքի գործը չէ, ովքեր նրան հրամցրել են այդ խնդիրը, նրանց մեջ է պետք փնտրել դիտավորությունը, թե ինչու են ընտրել այս թիրախները։ Ես չգիտեմ նախարարության տեսակետը, որովհետև նախարարությունը կերպարվեստից ձեռք է քաշել, չգիտեմ՝ ինչով է զբաղվում, բայց կերպարվեստի հետ գրեթե ոչ մի առնչություն չունի»,-Նկարիչների միությունում լրագրողների հետ զրույցում ասաց քանդակագործը՝ խոսելով  միությունների շենքերը պետականացնելու՝ իշխանությունների սկսած գործընթացի մասին։

Այդ ամենի մեջ Հաղթանակ Շահումյանը դիտավորություն է տեսնում՝ ՀՀ անկախությունը վարկաբեկելու համար։

«Մենք բոլորս երազել ենք անկախ երկիր, պետականություն ունենալու մասին, և այն, ինչ այսօր կատարվում է, այդ անկախությունը հեղինակազրկելու առիթ է լինելու։

Մեկ բան ինձ հստակ պարզ է, որ արվեստի միջավայրն ըստ էության ամենախոցելին է, հարձակումն այդտեղ է կատարվում։

Եկել, Միության շենքն են ուզում վերցնեն, նկարիչներին էլ թող վերցնեն աքսորեն Հայաստանից, պրծնի-գնա։ Սա միայն Նկարիչների միությանը չի վերաբերում, այս խնդիրը հետագայում տարածվելու է մյուս միությունների վրա

Դատախազությունը չէ մեղավորը, այլ այն մարդիկ ու կառույցները, որոնք այս ամենը հրամցնում են»,- եզրափակեց Հաղթանակ Շահումյանը։

Մանրամասները՝ 168.am-ի տեսանյութում