Հայաստանում ներդրվում է բժիշկների լիցենզավորման ինստիտուտ
Հայաստանում ներդրվում է բժիշկների լիցենզավորման ինստիտուտ:
«Բնակչության բժշկական օգնության և սպասարկման մասին» օրենքում փոփոխություններ և լրացումներ կատարելու մասին և կից ներկայացված օրենքների նախագծերի փաթեթը երկրորդ ընթերցմամբ ընդունելու համար ԱԺ նիստում ներկայացրեց Առողջապահության նախարար Անահիտ Ավանեսյանը:
Ավանեսյանը հիշեցրեց, որ փաթեթը ներառում է բժիշկների լիցենզավորման պահանջը: «Բնակչության բժշկական օգնության սպասարկման որակի բարձրացման առումով մեր կադրային ներուժի թե գիտելիքների, և թե հմտությունների բարձրացումը մեր ամենակարևոր խնդիրներից է»,-ասաց նախարարը:
Նա կարծում է, որ համակարգային այս բարեփոխումը պետք է նպաստի, որ բժիշկները տարեցտարի բարելավեն իրենց գործնական հմտություններն ու գիտելիքները, իսկ պետությունը լիցենզիայով ճանաչի նրանց աշխատելու իրավունքը:
«Լիցենզավորման մասին օրենքում փոփոխությունները վերաբերվում են անհատի լիցենզավորմանը: Այսինքն՝ բժիշկների լիցենզավորման ինստիտուտ է ստեղծվում Հայաստանում: 2000-ականների սկզբին ինչ-ինչ պատճառներով այս համակարգը վերացել էր: Եվ դրանից հետո բժշկի ավարտելուց հետո որևէ մեխանիզմ, գործիքակազմ չուներ պետությունը՝ հավաստիանալու նրա մասնագիտական գիտելիքների, հմտությունների և շարունակական զարգացման առումով»,-ասաց նախարարը:
Անհատական լիցենզավորումն իրականացվելու է քննական ձևով, այսինքն՝ տրամադրվելու է որոշակի հմտությունների ստուգման պարագայում: Լիցենզիաները տրվելու են 5 տարի ժամկետով:
