Բրազիլիան և Ֆրանսիան ծրագրում են 1 միլիարդ եվրո ներգրավել Ամազոնիայի պահպանության և զարգացման համար
Բրազիլիայի նախագահ Լուիս Ինասիու Լուլա դա Սիլվան և պաշտոնական այցով Բրազիլիայում գտնվող Ֆրանսիայի նախագահ Էմանուել Մակրոնը մարտի 26-ին ստորագրել են գործընկերության համաձայնագիր, որը ենթադրում է 1 միլիարդ եվրոյի չափով ներդրումների ներգրավում բրազիլական Ամազոնիայի և Ֆրանսիական Գվիանայի պահպանության և զարգացման նախագծերում: Այս մասին հաղորդել է Metropoles լրատվական հարթակը։
Նշվում է, որ ֆինանսավորումը ենթադրվում է ներգրավել առաջիկա չորս տարիների ընթացքում: Ծրագրերի գործընկերները կլինեն Բրազիլիայի առաջատար բանկերը և Ֆրանսիայի զարգացման գործակալությունը: Համաձայնագիրը նաև նախատեսում է Բրազիլիայում և Ֆրանսիական Գվիանայում կայուն զարգացման հետ կապված հետազոտական նախագծերի զարգացում։
Մակրոնը մարտի 26-ից 28-ը պաշտոնական այցով գտնվում է Բրազիլիայում։ Կողմերի քննարկման հիմնական թեմաներն են համագործակցությունը հիմնական գլոբալ խնդիրների, մասնավորապես՝ կլիմայի փոփոխության պայմաններում, ինչպես նաև տնտեսական հարաբերությունները:
