Պաղեստինի նախագահն ընդունել է կառավարության հրաժարականը
Պաղեստինի նախագահ Մահմուդ Աբբասն ընդունել է Մուհամմադ Շտայեի գլխավորած կառավարության հրաժարականը։ Այս մասին հայտնում է «WAFA» պաղեստինյան գործակալությունը։
Գործակալության տեղեկություններով՝ Աբբասն արդեն ստորագրել է համապատասխան հրամանագիրը։ Շտայեն և նրա գլխավորած կաբինետը կշարունակեն կատարել իրենց պարտականությունները մինչև նոր կառավարության կազմի հաստատումը։ Գործակալությունը նշում է, որ Շտայեն հրաժարականի դիմում է ներկայացրել Աբբասին փետրվարի 26-ին:
Փետրվարի 26-ի առավոտյան Շտայեն հայտարարել էր իր հրաժարականի մասին և ընդգծել, որ, իր կարծիքով, իր գործունեության ընթացքում իր ղեկավարած կառավարությունը կարողացել է հավասարակշռության հասնել քաղաքացիների պահանջների և Պաղեստինի ժողովրդի իրավունքների պաշտպանության միջև՝ չնայած մարտահրավերներին, որոնք ինքը ստիպված էր դիմակայել Գազայում սրման նոր փուլի լույսի ներքո:
