Վարազդատ Հակոբյանը սահմանել է հերթական ռեկորդը
Միջազգային կարգի սպորտի վարպետ, մարզիչ, ուժային եռամարտի աշխարհի չեմպիոն, «Դյուցազնագրքի» կրկնակի ռեկորդակիր, Սևան համայնքի ավագանու անդամ Վարազդատ Հակոբյանը նոր ռեկորդ է սահմանել։
Ինչպես տեղեկացանք Սևանի համայնքապետարանի աշխատակազմից, Վարազդատն այս անգամ մեջքով շրջված դիրքով բասկետբոլի զամբյուղի մեջ է նետել միանգամից միմյանց ամրացված 9 գնդակ` 2.5 մետր հեռավորությունից, որը հաջորդել է 6 գնդակով` դեմքով դեպի բասկետբոլի զամբյուղը նետում կատարած ռեկորդին։
Ռեկորդները գրանցվել են հայկական «Դյուցազնագրքում», որն արդեն 20-րդն է։
«Ինչպես Վարազդատն է նշում, հաղթանակները, առավել ևս սպորտում, հեշտ չեն տրվում, սակայն կա ձգտում, որին նա գնում է ընդառաջ ամենօրյա պարապմունքների և նպատակասլացության շնորհիվ։
Հիշեցնենք, որ Վարազդատը, դեռևս 2019 թվականին 23 տոննա գնացքը միջնամատով քաշելով 3 մետր 57 սանտիմետր տարածությամբ, սահմանել է նոր ռեկորդ։
Հաջորդ ռեկորդը Վարազդատը փորձելու է սահմանել ինքնաթիռով։
Վարազդատ Հակոբյանն առանձնահատուկ շնորհակալություն է հայտնում Սևան համայնքի ղեկավար Սարգիս Մուրադյանին, ՀՀ Դյուցազնագրքի հիմնադիր-նախագահ Վարդան Թովմասյանին»,-ներկայացրին Սևանի համայնքապետարանի աշխատակազմից։
Խոսրով Խլղաթյան
