ՌԴ-ն հայտնել է Բելգորոդի շրջանում 6 ԱԹՍ, իսկ Սև ծովում՝ հեռակառավարվող նավակ ոչնչացնելու մասին
Ռուսաստանի իշխանությունները հայտնել են, որ հակաօդային պաշտպանության ուժերը 6 անօդաչու թռչող սարք են խոցել Բելգորոդի շրջանում։ Այս մասին հայտնել է նահանգապետ Վյաչեսլավ Գլադկովն իր Telegram ալիքում։
«Հակաօդային պաշտպանության մեր համակարգը վեց անօդաչու թռչող սարք է խոցել Բելգորոդում և Բելգորոդի շրջանում: Նախնական տվյալներով՝ տուժածներ չկան», – գրել է նա՝ հավելելով, որ տեղում հետևանքները ճշտվում են:
Իր հերթին ՌԴ պաշտպանության նախարարությունը հայտնել է առավոտյան Սև ծովի ջրատարածքում Ուկրաինայի ԶՈւ-ին պատկանող հեռակառավարվող նավակ ոչնչացնելու մասին։ Ըստ գերատեսչության՝ նավակը լողում էր Ղրիմի թերակղզու ուղղությամբ։
