Ստոլտենբերգը Կիևում հանդիպում է անցկացրել Զելենսկիի հետ
ՆԱՏՕ-ի գլխավոր քարտուղար Յենս Ստոլտենբերգը չհայտարարված այցով մեկնել է Կիև և հանդիպել Ուկրաինայի նախագահ Վլադիմիր Զելենսկիի հետ։ Կողմերը քննարկել են Ուկրաինայում հակաօդային պաշտպանության ուժեղացումը։ Այդ մասին տեղեկանում ենք France 24 պարբերականից:
«Գլխավոր քարտուղարը համաձայնել է ջանքեր գործադրել՝ օգնելու և աջակցելու մեզ այս հարցում, մոբիլիզացնելու դաշինքի անդամ երկրներին… Մենք պետք է միասին հաղթահարենք այս ձմեռը, պաշտպանենք մեր էներգետիկ ենթակառուցվածքը և մարդկանց կյանքերը», – ասել է Զելենսկին համատեղ մամուլի ասուլիսի ընթացքում։
ՆԱՏՕ-ի գլխավոր քարտուղարն իր հերթին հայտարարել է, որ Զելենսկիի հետ քննարկել է դաշինքի կողմից Ուկրաինային աջակցելու հետագա քայլերը։ Նա նաև նշել է, որ ուկրաինական ուժերն «աստիճանաբար առաջխաղացում են գրանցում» ռուսական ուժերի դեմ հակահարձակման ընթացքում։
