Վրաստանում սողանքի զոհերի թիվը հասել է 11-ի
Վրաստանի Ռաչայի բարձրլեռնային երկրամասի Շովի առողջարանային ավանում սողանքի զոհերի թիվը հասել է 11-ի։ Այդ մասին տեղեկանում ենք Sputnik գործակալության վրացական ծառայությունից:
Այս տվյալները հաղորդել է երկրի առողջապահության նախարարը։
«Ռաչայում լուրջ ողբերգություն է տեղի ունեցել։ Ես չափազանց մոտ էի, և շատ ծանր էր այն, ինչ տեսա տեղում՝ էպիկենտրոնում։ Այս տարածաշրջանի համար սա շատ մեծ աղետ է։ Ցավոք, արդեն հայտնաբերվել է 11 մահացած, 25 մարդու որոնումները շարունակվում են», – ասել է նախարար Զուրաբ Ազարաշվիլին։
Իր հերթին Վրաստանի վարչապետ Իրակլի Ղարիբաշվիլին հայտնել է, որ որոնողափրկարարական աշխատանքներին կներգրավեն զինվորականների։
Շովիում սողանքը տեղի է ունեցել օգոստոսի 3-ին: Դրա հետևանքով վնասվել են կամուրջներ ու ճանապարհներ, ինչպես նաև զբոսաշրջային քոթեջներ և «Սանսեթ Շովի» հյուրանոցը։ Որոնողափրկարարական աշխատանքներին միացել են Վրաստանի ներքին գործերի նախարարության 2 ուղղաթիռ, շուրջ 400 փրկարար և կինոլոգներ։ Երկու օրվա ընթացքում հաջողվել է տարհանել 210 մարդու:
