Լեհաստանում Լուկաշենկոյի պահապան ծառայությանը մեղադրել են օդային սահմանը խախտելու մեջ, Մինսկը հերքել է դա
Լեհաստանում հայտարարել են, որ օգոստոսի 1-ին Բելովեժի շրջանում երկրի օդային սահմանը խախտած ռազմական ուղղաթիռները պատկանել են Բելառուսի նախագահ Ալեքսանդր Լուկաշենկոյի պահապան ծառայությանը։ Սակայն բելառուսական կողմը հերքել է այս մեղադրանքները։ Այս մասին տեղեկանում ենք ТАСС-ի հրապարակումներից։
«Այդ ուղղաթիռները նույնականացվել են, դրանք պատկանում են Լուկաշենկոյի պահապան ծառայությանը։ Ես չեմ բացառում, որ դա եղել է գիտակցված գործողություն, բայց նաև չեմ բացառում, որ դա եղել է պատահականություն», – RMF FM ռադիոկայանի եթերում ասել է Լեհաստանի կառավարության նախկին ղեկավար, Եվրախորհրդարանի պատգամավոր Վլոձիմեժ Չիմոշևիչը։
Նա հավելել է, որ Լուկաշենկոն այդ ժամանակ ժամանել է իր նստավայր Բելովեժյան թավուտի տարածքում, որը գտնվում է լեհ-բելառուսական սահմանից 7 կմ հեռավորության վրա։
Այս միջադեպից հետո Լեհաստանն ավելացրել է Բելառուսի հետ սահմանին զինծառայողների թիվը և ուժեղացրել մարտական ուղղաթիռներով սահմանի պաշտպանությունը։
Բելառուսի պաշտպանության նախարարությունը մտացածին է անվանել Բելառուսի ռազմաօդային ուժերի և հակաօդային պաշտպանության ուժերի Մի-8 և Մի-24 ուղղաթիռների կողմից Լեհաստանի սահմանի խախտման մեղադրանքները։ Ըստ Մինսկի՝ դրանք Լեհաստանի ռազմաքաղաքական ղեկավարության կողմից արվել են բելառուսական սահմանի մոտ ուժերի և միջոցների կուտակումն արդարացնելու համար:
Բելառուսի արտգործնախարարության խոսնակն իր հերթին ТАСС-ին հայտնել է, որ «լեհական տարածք մուտք չի եղել, նման փաստ չի արձանագրվել», հետևաբար, Վլոձիմեժ Չիմոշևիչի «ենթադրությունները ոչ մի մասով չեն համապատասխանում իրականությանը»։
