Աննա Հակոբյանը 11.000 դասալիքի մասին էր մեծ-մեծ խոսում, քո տղեն որերո՞րդ դասալիքն է, նա թիվ մեկ դասալիքն է. Վահիդ Սահակյան

Երևանի ընդհանուր իրավասության դատարանը՝ դատավոր Ժորա Չիչոյանի նախագահությամբ, որոշում է կայացրել 1 ամսով կալանավորել 44-օրյա պատերազմում զոհված զինծառայող Ժորա Մարտիրոսյանի մորը՝ Գայանե Հակոբյանին: Դրանից հետո զոհված զինծառայողների ծնողները բողոքի ակցիաներ սկսեցին Երևանի փողոցներում, որը շարունակվում է:

44-օրյա պատերազմում զոհված Ժորա Սահակյանի հայրը՝ Վահիդ Սահակյանը, շեշտել է՝ Աշոտ Փաշինյանը Գայանե Հակոբյանի մեքենան նստել է ինքնակամ:

«Մեքենան վարելով՝ Գայանեն ի՞նչ պիտի ասեր 25 տարեկան վախկոտ երիտասարդին, որին հայրը որպես ռեմբո էր ներկայացնում ամբողջ հայությանը, թե գնացել է Ջաբրայիլն ազատագրելու, թե իբր գնացել է փախչող տղաներին վերադարձնելու: Եվ հիմա այդ վախկոտ տղան, այդ Աշոտիկը միանգամից իրեն մեքենայից նետում է ցած: Ահա այս դրվագի համար այսօր կալանավորել են Գայանեին»,- նշել է զոհված զինծառայողի հայրը և հիշեցրել Աննա Հակոբյանի՝ 11.000 դասալիքի մասին պնդումը:

«Մերը 11.000 դասալիքի մասին էր մեծ-մեծ խոսում: Քո տղեն որերո՞րդ դասալիքն է: Ես կասեի՝ թիվ մեկ դասալիքն Աշոտիկն է եղել, և հենց Աշոտիկի և նրա նման մի քանիսի պատճառով մենք ունեցել ենք հազարավոր զոհեր ու հայրենիք ենք կորցրել: Սա է Փաշինյանների ամբողջ կենսագրությունը: Կրկնում եմ՝ թիվ մեկ դասալիքն Աշոտիկն է: Ամոթ քեզ, Աշոտիկ»,- հայտարարել է Վահիդ Սահակյանը՝ հավելելով, որ մի օր Աշոտ Փաշինյանն իր արարքի համար պատասխան է տալու և հայտնվելու է այնտեղ, որտեղ հերոսածին մայրերին շատ են հարգում, բայց իրեն օր և արև չեն տալու:

Ապրիլի 1-ին Տավուշ կատարած այցի ընթացքում Աննա Հակոբյանը հայտարարել էր, որ 11.000 դասալիք ենք ունեցել 44-օրյա պատերազմի ընթացքում՝ կամավոր, զինվորական և այլն:

168.am-ն այս համատեքստում բաց փաստերի հիման վրա ներկայացրել էր, թե երբ և որտեղ է եղել 44-օրյա պատերազմի ժամանակ Աշոտ Փաշինյանը, ինչ զարգացումներ են եղել իշխանական շրջանակներից նրա շուրջ:

Իսկ Դատախազությունն ու Քննչական կոմիտեն 168.am–ի հարցումներին ի պատասխան, ըստ էության, չէին հաստատել Աննա Հակոբյանի ադրբեջանական թեզը:

«Միայն 2020 թվականի 44-օրյա պատերազմի և հայտարարված ռազմական դրության ժամանակահատվածում զինվորական ծառայության պարտականությունները կատարելուց հրաժարվելու (ՀՀ նախկին քրեական օրենսգրքի 364-րդ հոդվածի 3-րդ մաս), զորամասը կամ ծառայության վայրն ինքնակամ թողնելու (ՀՀ նախկին քրեական օրենսգրքի 361-րդ հոդվածի 7-րդ մաս) և դասալքության (ՀՀ նախկին քրեական օրենսգրքի 362-րդ հոդվածի 3-րդ մաս), դրանց հետ համակցությամբ այլ հանցագործությունների դեպքերի առթիվ նախաձեռնվել է 1786 քրեական վարույթ, որոնք առնչվում են շուրջ 10690 անձի։

ՀՀ նախկին քրեական օրենսգրքի վերոնշյալ երեք հոդվածներով և դրանց հետ համակցությամբ այլ հոդվածներով քննված քրեական վարույթներով քրեական հետապնդում է հարուցվել ընդհանուր 756 անձի նկատմամբ։

Նշված հոդվածներով հարուցված 225 վարույթի նախաքննությունը շարունակվում է, 280 քրեական վարույթ կարճելու մասին որոշումներ են կայացվել։

Նշված երեք հոդվածներով հարուցված 118 վարույթ՝ 143 անձի վերաբերյալ, ավարտվել է մեղադրական եզրակացությամբ»,- մասնավորապես, 168.am-ին հայտնել էին ՔԿ-ից:

Ի դեպ, մայիսի 8-ին լրագրողների հետ զրույցում էլ ՀՀ ԶՈՒ ԳՇ պետի նախկին տեղակալ Տիրան Խաչատրյանը 11.000 դասալիքների լինել-չլինելու հետ կապված ասել էր.

«Եթե ես բժիշկ չեմ, ես բժշկությունից չպետք է խոսեմ, եթե ես քաղաքական գործիչ չեմ, ես այդ քաղաքական երևույթների մեջ իմ վերաբերմունքը կամ դրսևորումները չպետք է ունենամ։ Մարդը, եթե ունի մի փոքր բարոյականություն, այն հարցերը, որոնք իրեն չեն վերաբերում, քիթը չպետք է խոթի դրանց մեջ: Իրականում մասսայական դասալքություն եղել է, բայց պետության վարած քաղաքականությունից, քանի որ համապատասխան քայլեր այդ ուղղությամբ չի իրականացվել, դա Զինված ուժերի խնդիրը չի եղել»: