«Մեկ ստորակետ է մնացել, որ պաշտոնական Երևանը հստակ ու վերջնականապես ասի իր տեսակետը՝ Շառլ Միշելը ծուղակ գցեց». Դավիթ Բաբայան
Մայիսի 14-ին Բրյուսելում Եվրոպայի խորհրդի նախագահ Շառլ Միշելի, Հայաստանի և Ադրբեջանի ղեկավարներ Նիկոլ Փաշինյանի և Իլհամ Ալիևի եռակողմ հանդիպումից հետո Շ. Միշելը հանդես եկավ հայտարարությամբ՝ փաստելով, որ Հայաստանն ու Ադրբեջանը ճանաչել են միմյանց տարածքային ամբողջականությունը։
«Հաջորդ քայլը լինելու է սահմանների դելիմիտացիան 1991թ. Ալմա Աթայի հռչակագրով։
Այն ենթադրում է տարածքային ամբողջականության փոխադարձ ճանաչում և, մասնավորապես, Հայաստանի տարածքային ամբողջականության ճանաչում 29,8 հազար քառ. կմ-ի սահմաններում, և Ադրբեջանինը` 86,6 հազար քառ. կմ-ի սահմաններում»,- նշված է Շառլ Միշելի հայտարարության մեջ։
168.am-ի հետ զրույցում Արցախի Հանրապետության նախագահի խորհրդական, հատուկ հանձնարարությունների գծով ներկայացուցիչ, ԱԳ նախկին նախարար Դավիթ Բաբայանն անդրադառնալով երեկվա հանդիպմանը և դրան հաջորդած հայտարարությանը, նախ ասաց, որ Միշելի այդ հայտարարությունն իսկապես զզվելի ու գարշելի հայտարարություն է.
«Միշելն իրեն նմանեցրեց Չեմբեռլենի հետ՝ 1938 թվականի մյունխենյան խայտառակ դավադրությունը կրկնվեց։
Երկրորդը՝ փաստորեն Միշելը՝ ի դեմս Եվրոպայի, դեռևս չեմ ասում՝ հավաքական Արևմուտք, մեկ ստորակետ է մնացել, տեսնենք՝ Միացյալ Նահանգները վերջնական ինչ կարծիքի է, բայց փաստորեն սա ցույց տվեց, որ Եվրոպան թքեց ժողովրդավարության վրա՝ մյունխենյան երկրորդ դավադրություն իրականացնելով։ Փաստորեն նրանք արդարացրեցին 2020 թվականի Ադրբեջանի ագրեսիան, արդարացրեցին այդ երկրի կողմից վարվող նացիստական քաղաքականությունը՝ Արցախի շրջափակման, անցակետի տեղադրման և այլն։ Ավելին, փաստորեն իրենք էլ հնարավոր է՝ գոտեպնդեին Ադրբեջանին այդ ամենն իրականացնելու համար, որովհետև ագրեսիան որևէ գնահատականի չարժանացավ։ Այսօր խոսում են Ուկրաինայի մասին, բա ինչո՞ւ մեր մասին չեք խոսում, այսինքն՝ ինչ է սա ցույց տալիս, փաստորեն իրենք են նաև այդ ագրեսիայի ուղղակի և անուղղակի մասնակիցները, որովհետև գնահատական չտվեցին և Արցախը բռնակցում են տոտալիտար Ադրբեջանին»,- նշեց Դավիթ Բաբայանը։
Դավիթ Բաբայանի խոսքով՝ այս ամենի մեջ միակ լավ բանն այն է, որ վերջապես Շառլ Միշելն ասաց ճշմարտությունը, որ սա է Եվրոպայի մոտեցումը։
«Նախևառաջ՝ մեկ ստորակետ է մնացել, որ պաշտոնական Երևանը հստակ ու վերջնականապես ասի իր տեսակետը։ Փաստորեն Շառլ Միշելը ծուղակ գցեց՝ հայտարարեց թիվ, որպեսզի վաղը-մյուս օրը որևէ մեկը չհրաժարվի, ասի՝ ես նման բան չեմ ընդունել։ Հիմա մենք պետք է հասկանանք՝ սա պաշտոնական Երևանն ընդունո՞ւմ է, թե՞ չի ընդունում, հավաստիացնո՞ւմ է, որ այդպես է, թե՞ չէ։ Այսպիսով՝ պետք է իմանանք պաշտոնական Երևանի դիրքորոշումը և պետք է իմանանք հայ ժողովրդի, գուցե հայ ժողովուրդն ուզում է, որ Արցախը տան, արցախահայությունը սպանդի ենթարկվի՝ չգիտեմ»,- հավելեց Դավիթ Բաբայանը։
Ըստ Դավիթ Բաբայանի, եթե Արցախը հայ ազգը ճանաչում է Ադրբեջանի մաս, ուրեմն, պետք է պապանձվի ու այլևս չխոսի Տիգրան Մեծից, Գրիգոր Լուսավորիչից, Նարեկացուց և այլն։
«Ես հիմա տեսնում եմ, որ նոր դիսկուրս են մտցնում, թե Երրորդ Հանրապետությունը փոխենք չորրորդով, հատուկ որպեսզի շեղեն, ի՞նչ երրորդ ու չորրորդ, Հայաստանն է վերանում։
Ինքս հավատացյալ մարդ եմ, Աստված մեծ է, բայց նաև ես հասկանում եմ, որ դարերի ընթացքում սխալ ենք թույլ տվել և այդ կեղտը պետք է ուտենք, որովհետև առանց դրա ապաքինում չի լինի։ Մենք իսկապես պետք է իմանանք, թե ով ենք մենք, ամենավատ բաները պետք է ցույց տանք ու որևէ բան չպետք է քողարկենք։ Փաստորեն հիմա կա երկու ելք, կա՛մ ազգովի պայքարում ենք, կռվում ենք, կա՛մ արժանապատվորեն չպետք է ընդունենք Ադրբեջանի լուծը, եթե նույնիսկ դա բերի Բիբլիական դուրս գալուն, բայց մեզ ոչխարի տեղ չպետք է դնեն, որովհետև ոչխարի վերջը խորովածն է»,- եզրափակեց Դավիթ Բաբայանը։
