Առողջապահության նախկին փոխնախարարը Քաղաքապետարանում պաշտոն ստացավ
Շավարշ Գրիգորյանը նշանակվել է Երևանի քաղաքապետարանի աշխատակազմի քարտուղարի ժամանակավոր պաշտոնակատար։ Տեղեկությունն ապրիլի 17-ին Երևանի քաղաքապետարանի գործակարգավարական խորհրդակցության ժամանակ հայտնեց փոխքաղաքապետ Տիգրան Ավինյանը։
«Պարոն Գրիգորյանը եղել է Առողջապահության փոխնախարար, և մենք միասին աշխատել ենք քովիդի ամենածանր ժամանակաշրջանում։ Շնորհավորում եմ Ձեր նշանակման կապակցությամբ»,- ասաց Ավինյանը:
Նա նաև հայտնեց Երևանի քաղաքապետարանի աշխատակազմի ճարտարապետության ու քաղաքաշինության վարչության պետի ժամանակավոր պաշտոնակատարի պաշտոնում Հայկ Մուրադյանի նշանակման մասին։
«Երևի թե ամենածանրաբեռնված վարչությունն է, և շատ դեպքերում խնդիրներ ունենք ժամկետանց գրությունների հետ կապված, և ժամանակ կար, որ այդ վարչությունը կոչում էինք «սև խոռոչ»»,- ասաց Տիգրան Ավինյանը:
Նշենք, որ նախքան նախարարի տեղակալ նշանակվելը Շավարշ Գրիգորյանը եղել է «Առողջապահական ծրագրերի իրականացման գրասենյակ» պետական հիմնարկի տնօրենի պաշտոնակատար, ինչպես նաև զբաղեցրել է Սևանի հոգեկան առողջության պահպանման կենտրոնի տնօրենի պաշտոնը: Նա եղել է նաև առողջապահության նախկին նախարար Լևոն Ալթունյանի օգնականը։
