Հունաստանը չի պատրաստվում ամերիկյան բազա ստեղծել Ալեքսանդրուպոլիսում
Հունաստանի հյուսիսում գտնվող Ալեքսանդրուպոլիս նավահանգստում ամերիկյան ռազմաբազա տեղակայելու պլաններ չկան:
Այս մասին Ալեքսանդրուպոլիսում կայացած մամուլի ասուլիսի ժամանակ հայտարարել է Հունաստանի վարչապետ Կիրիակոս Միցոտակիսը:
Հունաստանի հետ 2021 թվականի հոկտեմբերի 14-ին ստորագրված պաշտպանության նոր համաձայնագրով՝ Միացյալ Նահանգների տրամադրության տակ են անցել մի քանի նոր ռազմաբազաներ, այդ թվում՝ Հունաստանի հյուսիսում գտնվող Ալեքսանդրուպոլիս նավահանգիստը և նրա կողքին գտնվող ռազմական ճամբարը։
Ալեքսանդրուպոլիսի նավահանգիստը դարձել է ամերիկյան ռազմական տեխնիկայի տարանցման ամենամեծ նավահանգիստը դեպի Արևելյան Եվրոպա և Ուկրաինա։
Հարցին, թե արդյոք ԱՄՆ-ի հետ Հունաստանի պաշտպանական համագործակցության համաձայնագրի շրջանակներում նախատեսվում է Ալեքսանդրուպոլիսում ամերիկյան ռազմաբազա ստեղծել՝ Միցոտակիսը պատասխանել է, որ ո՛չ:
«Թե ինչպե՞ս կարող է ԱՄՆ-ն օգտագործել դա, հստակ սահմանված է երկկողմ պաշտպանական համագործակցության համաձայնագրում»,- պատասխանել է Հունաստանի վարչապետը։
Խոսելով Ալեքսանդրուպոլիսի նավահանգստի սեփականաշնորհումից հրաժարվելու կառավարության որոշման մասին՝ վարչապետն ասել է, որ դա չի ազդի զարգացման ծրագրերի վրա։
«Մեր նպատակն է ունենալ ժամանակակից նավահանգիստներ՝ ամենաժամանակակից սարքավորումներով»,- ասել է Միցոտակիսը։
Նրա խոսքով՝ Ալեքսանդրուպոլիսով կարող է անցնել ցամաքային միջանցք դեպի Սև ծով, որը կարող է այլընտրանք դառնալ Բոսֆորի նեղուցին։
