Հայաստանի կենտրոնական ընտրական հանձնաժողովի անդամներն առաջին անգամ հյուրընկալվել են Հնդկաստանի ԿԸՀ-ում
Հնդկաստանի ընտրական հանձնաժողովը հոկտեմբերի 31-ից նոյեմբերի 2-ը կազմակերպել էր «Ընտրությունների կառավարման մարմինների դերը, շրջանակը և կարողությունը» թեմայով միջազգային գագաթնաժողով։ Հայաստանի կենտրոնական ընտրական հանձնաժողովից հրավիրված էին ԿԸՀ անդամներ Արուսյակ Տերչանյանը և Սիլվա Մարկոսյանը։
Ինչպես հայտնում են ՀՀ ԿԸՀ-ից, գագաթնաժողովի նպատակն էր ընտրությունները կազմակերպող մարմինների միջև փորձի փոխանակում կազմակերպել, հասկանալ հիմնական մարտահրավերներն ու հրավիրյալ երկրների ընտրական մարմինների կարողությունները։
ԿԸՀ անդամներն ամփոփելով այցը, նշում են՝ գագաթնաժողովին Հայաստանը ներկայացված է եղել որպես պատվավոր հյուր, իսկ մասնակցությունն ինքնին արդյունավետ էր, քանի որ հնարավորություն է ստեղծվել մասնագիտական քննարկում ծավալել ընտրական տարբեր գործիքակազմերի վերաբերյալ, դիտարկել տարբեր երկրների ընտրական նորարարությունները։
Գագաթնաժողովին մասնակցել են Հայաստանի, Հունաստանի, Մավրիկիոսի Հանրապետության ընտրական հանձնաժողովների, Ընտրական համակարգերի միջազգային հաստատության (IFES), ՄԱԿ-ի, Նեպալի, Կաբո Վերդեի, Ավստրալիայի, Չիլիի, Միկրոնեզիայի Դաշնային Նահանգների, Ֆիլիպինների, ինչպես նաև՝ Միջազգային IDEA կազմակերպության ներկայացուցիչներ, դեսպաններ/Գերագույն հանձնակատարներ և այլ անդամներ Կոստա Ռիկայից, Գանայից, Ջամայկայից, Ալբանիայից, Նեպալից, Չեռնոգորիայից, Իսպանիայից, և այլ պաշտոնատար անձինք։
Գագաթնաժողովը շարունակական է լինելու, հաջորդիվ կոնֆերանսների խորագրերն են՝ «Տեխնոլոգիաների օգտագործում և ընտրությունների ամբողջականություն» և «Ներառական ընտրություններ և ընտրությունների ամբողջականություն»։
