«Կոնկրետ մարզպետն է այստեղ եկել այդ ամենը ճշտելու՝ չկա նման բան». Տեղ համայնքի ղեկավարը հերքում է
168.am–ի հետ զրույցում Սյունիքի մարզի Տեղ համայնքի ղեկավար Դավիթ Ղուլունցը հերքեց տեղեկությունը, թե համայնքի բնակիչներից 5000-ական դրամ է հավաքում, որպեսզի սալիկապատի համայնքի փողոցները։
«Մամուլում կարդացել եմ այդ հրապարակումը, մարզպետարանում նույնպես կարդացել են, և մարզպետն անձամբ է եկել Տեղ համայնք՝ հասկանալու համար՝ ինչ է կատարվում։ Շրջանառվող այդ տեղեկությունը մարզպետարանի կայքով և մեր կողմից արդեն հերքվել է, չկա նման բան։
Ասում եմ՝ կոնկրետ մարզպետն է այստեղ եկել այդ ամենը ճշտելու, ինձ էլ էր հետաքրքիր, թե ինչու է նման տեղեկություն շրջանառվում։ Ավագանու այդ անդամը, որը նման հայատարարություն էր արել, Տեղ համայնքում չի ապրում, արդեն 3-4 ամիս է՝ գտնվում է ՌԴ-ում, մեր նիստերին չի մասնակցում։ Չգիտես՝ ինչու, միայն այդ մարդն է ապատեղեկատվություն տարածում իմ մասին․ հետաքրքիր է, որտեղի՞ց է այդ սուտ լուրերը տարածում»,- նշեց Տեղ համայնքի ղեկավարը։
Նա ևս մեկ անգամ ընդգծեց, թե գաղափար չունի՝ ինչո՞ւ են նման լուրեր տարածում իր մասին, հատկապես այն դեպքում, երբ դրանք մշտապես հերքվում են։
