Բակո Սահակյանն ու Արկադի Ղուկասյանը կմասնակցեն Ստեփանակերտի Ջահերով երթին
Երևանում այսօր երեկոյան անցկացվելիք Ջահերով երթին կմիանա նաև Արցախի Հանրապետության մայրաքաղաք Ստեփանակերտը: Երթը կկրի «Զարթնի՛ր, լաո՛, և միացի՛ր ջահերով երթին» խորագիրը:
Ավելի վաղ ՀՅԴ Արցախի երիտասարդական միությունը հայտարարություն էր տարածել, ըստ որի՝ ս.թ. ապրիլի 23-ին ՀՅԴ Արցախի երիտասարդական միության նախաձեռնությամբ տեղի կունենա «Զարթնի՛ր, լաո՛…» կարգախոսով ավանդական ջահերով երթ, որը կմեկնարկի Ստեփանակերտի Սուրբ Հակոբ եկեղեցու բակից: 19:30-ին կմատուցվի պատարագ, ինչից հետո կսկսվի երթը՝ 20:00-ին:
«Համազգային զարթոնքով կանխե՛նք նոր ցեղասպանությունն Արցախում»,- այս կոչով են հանդես եկել Արցախ ՀՅԴ-ականները:
168.am-ի տեղեկություններով՝ Ստեփանակերտի Ջահերով երթին կմասնակցեն նաև Արցախի նախկին նախագահներ Բակո Սահակյանն ու Արկադի Ղուկասյանը:
Ըստ էության այս նախաձեռնությունը միշտ երիտասարդական է եղել, և դրան մասնակցել են երիտասարդները, սակայն հաշվի առնելով ստեղծված իրավիճակը թե Արցախում և թե Հայաստանում, նախագահները նույնպես այս անգամ կմասնակցեն երթին:
Ջահերով երթին Ստեփանակերտում կմասնակցի նաև արցախյան գեներալիտետը:
Ավելի վաղ տեղեկացրել էինք, որ Երևանում Ջահերով երթին կմասնակցեն նաև ՀՀ երկրորդ և երրորդ նախագահներ Ռոբերտ Քոչարյանն ու Սերժ Սարգսյանը:
