«Ես դիմել էի խաղաղապահներին, իրենք էլ ընդառաջում են, մնում է մյուս թևը՝ ադրբեջանական կողմն արձագանքի». Արցախի թեմի առաջնորդը՝ Դադիվանք այցի մասին
Արցախի Հանրապետության թեմի առաջնորդ առաջնորդ Գերաշնորհ Տ․Վրթանես եպիսկոպոս Աբրահամյանը դիմել է Արցախում տեղակայված ռուս խաղաղապահներին՝ Սուրբ Հարության տոնին ուխտագնացություն կազմակերպել դեպի Դադիվանք։
«Ես դիմել էի խաղաղապահներին, իրենք էլ ընդառաջում են, մնում է մյուս թևը՝ ադրբեջանական կողմն արձագանքի, տեսնենք՝ նա ինչ է ասում։ Երբ դիմեցի ռուս խաղաղապահներին, նրանք ասացին՝ Սրբազան ջան, ցուցակ և տրանսպորտ տուր մեզ, ես էլ տվել եմ։ Հիմա ժողովրդին հավաքում եմ՝ 50-60 հոգի, որ այդ օրը տանեն։ Եթե ստացվի՝ ուրեմն՝ ավելի լավ բոլորիս համար, կգնանք՝ կաղոթենք, եթե չստացվի, չգիտեմ՝ ինչ ասեմ։ Առայժմ՝ այսքանը»,- եզրափակեց Տ. Վրթանես եպիսկոպոս Աբրահամյանը։
Հիշեցնենք, որ նախորդ տարվա մայիսից Ադրբեջանը, առանց որևէ բացատրության, հայկական կողմին արգելել է Դադիվանք ուխտավորներ ուղարկել, թեև նոյեմբերի 25-ին Արցախի Քարվաճառի շրջանը հանձնելուց հետո Ադրբեջանի հետ համաձայնություն ձեռք բերվեց, որ Դադիվանքում մնալու են հայ հոգևորականները, և յուրաքանչյուր կիրակի հայ ուխտավորները հնարավորություն կունենան այցելելու այնտեղ՝ մասնակցելու պատարագներին։ Մի քանի ամիս պատարագներին մասնակցելուց հետո, ուխտավորները զրկվեցին այդ հնարավորությունից։
