Դրագին հայտնել է, որ Ռուսաստանի դեմ պատժամիջոցները դեռ երկար կշարունակվեն
Ուկրաինայում ստեղծված իրավիճակի առնչությամբ Ռուսաստանի դեմ Արևմուտքի սահմանած պատժամիջոցները երկար ժամանակ կշարունակվեն: Այս մասին Իտալիայի պատգամավորների պալատում օրենսդիրների հարցերին ի պատասխան հայտարարել է վարչապետ Մարիո Դրագին:
«Մենք մտադիր չենք հետ կանգնել պատժամիջոցների մեր քաղաքականությունից, որը համաձայնեցված է մոր բոլոր դաշնակիցների հետ: Միևնույն ժամանակ, պետք է անենք ամեն բան, որպեսզի համապատասխանենք մեր ներքին կուրսին»,- հայտարարել է Դրագին:
Նրա խոսքով՝ Իտալիայի իշխանությունները պետք է դեռ վերլուծեն կատարվածի հետևանքները: «Մենք պատրաստ ենք հնարավոր բոլոր միջոցները ձեռնարկել՝ պաշտպանելու ընտանիքների գնողունակությունը և աջակցելու ընկերություններին»,- «ՌԻԱ Նովոստի»-ի փոխանցմամբ, ասել է նա:
