Արցախի խորհրդարանական ուժերը հավանություն են տվել վարչատարածքային բարեփեփումները մինչև 2024 թվական հետաձգելու առաջարկին
Արցախի Հանրապետության Ազգային ժողովում հուլիսի 7-ին կազմակերպվել է քննարկում վարչատարածքային բարեփոխումների թեմայով: Նախաձեռնությունը Արցախի Հանրապետության տարածքային կառավարման և ենթակառուցվածքների նախարարությանն է եղել: Քննարկմանը ներկա է գտնվել Արցախի տարածքային կառավարման և ենթակառուցվածքների նախարար Հայկ Խանումյանը:
Բարեփոխումների էությունն ու նպատակահարմարությունը ներկայացրել է տարածքային կառավարման և ենթակառուցվածքների նախարարի տեղակալ Համլետ Ապրեսյանը:
Նախնական հայեցակարգի նախագիծը մշակվել է նախարարության կողմից: Այն վարչատարածքային բաժանման վերանայում է նախատեսում: Նախագծի հեղինակները համայնքների վերակազմավորման, օպտիմալացման անհրաժեշտություն են տեսնում:
Խոշորացման վերաբերյալ անպայման պիտի հաշվի առնվի բնակչության կարծիքը՝ խորհրդարանականները նման տեսակետ են հնչեցրել: Նաև նշել են, որ հիմա վարչատարածքային բաժանման ժամանակը չէ: Որոշվել է վերլուծել ընթացիկ իրավիճակն ու նախանշել զարգացման հեռանկարները:
Ըստ Սահմանադրության վարչատարածքային բարեփոխումները պիտի ավարտված լինեն մինչև 2021 թվականի մարտ ամիսը: Առկա իրողություններում առաջարկ է հնչեցվել այդ ժամկետը երկարաձգել մինչև 2024 թվականի սեպտեմբեր: Խորհրդարանում ներկայացված բոլոր քաղաքական ուժերն էլ իրենց հավանությունն են տվել առաջարկին:
