Տարիների աշխատանքով ձեռք բերվածը 1 րոպեում վերածվեց մոխրի. Գազի արտահոսքից այրված բնակարանը վերանորոգելու համար օգնություն է անհրաժեշտ
Դեռևս անհայտ պատճառներով մայիսի 10-ին գազի արտահոսքից ամբողջությամբ այրվել է Շենգավիթ վարչական շրջանում գտնվող շենքերից մեկի 2-րդ հարկում գտնվող մեկ սենյականոց բնակարանը, իսկ ընտանիքի անդամները հայտնվել են դրսում:
«Դեպքը տեղի է ունեցել կեսօրին: Հին, սովետական գազ էր, կարող է՝ անսարք է եղել, կամ այլ խնդիր է եղել, այս պահին գազի արտահոսքի պատճառը չգիտեմ: Վնասվել է նաև ամբողջ միջանցքը: ԱԻՆ-ից եկել, նկարել են: Այդ պահին տանը մենակ մայրս է եղել: Հիմա այնտեղ անհնար է ապրել, ես այդքան ֆինանսական հնարավորություն չունեմ, որ սարքեմ:
Տարիների աշխատանքով ձեռք բերվածը մեկ րոպեում վերածվեց մոխրի: Շատ բան նաև ապառիկով էինք ձեռք բերել: Հայրս մահացած է, քույր, եղբայր չունեմ: Թեկուզև գումարով չօգնեն, թող օգնությունը ներկի, շինանյութի տեսքով լինի: Ես չգիտեմ՝ ինչ անեմ, մայրս իմ համար այդքան աշխատել, մենակ մեծացրել է, ի՞նչ անեմ, ո՞նց օգնեմ: 4 կողմից էլ հարձակվում են մեզ վրա, ոմանք առիթից ուզում են օգտվել: Մեկը տունն է ուզում գնել, մյուսը դրա փոխարեն հանրակացարան է առաջարկում, ինչը խելքին մոտ չէ»,- 168.am-ի հետ զրույցում ասաց Վարդուհի Հայրապետյանը:
Տունը վերանորոգելու համար ընտանիքին գումարով օգնել հնարավոր է ՎՏԲ-Հայաստան բանկի նշված հաշվեհամարի միջոցով, որը Վարդուհու մոր՝ Ֆլորա Հայրապետյանի անունով է՝ 16069023284004:
