Ջազի միջազգային օրը Երևանում չի կայանա․ Քաղաքապետարանը՝ այն չֆինանսավորելու պատճառի մասին
Համացանցում տեղեկություն է տարածվել այն մասին, որ Ջազի միջազգային օրը Երևանում չի կայանա. Երևանի քաղաքապետարանը թույլ չի տվել։
«Քաղաքապետարանը ոչ թե թույլ չի տվել կամ արգելել է, այլ նպատակահարմար չի գտել ֆինանսավորել համերգը՝ մի շարք պատճառներով, մասնավորապես, Ջազի հայկական ասոցիացիայի կողմից ներկայացված նախահաշվում ողջամիտ կասկածներ կան, որ գրեթե կրկնակի ծախսերն ուռճացված են։ Սա ուղարկվել է համապատասխան մարմիններին»,- 168.am-ին հայտնեցին Երևանի քաղաքապետարանից։
Հավելենք, որ մայիսի 1-ին, ժամը 13:00-ին Sputnik Արմենիայի մուլտիմեդիոն կենտրոնում տեղի կունենա Ջազի հայկական ասոցիացիայի նախագահ Կամո Մովսեսյանի մամուլի ասուլիսը: Թեման՝ Երևանի քաղաքապետարանը առանց հիմնավոր պատճառների մերժել է Ջազի հայկական ասոցիացիայի՝ Երևանում Ջազի միջազգային օրն անցկացնելու նախաձեռնությունը: Ասուլիսի ընթացքում Կամո Մովսեսյանը կհրապարակի Երևանի քաղաքապետարանի գրավոր մերժման բովանդակությունը և կներկայացնի դրա անհիմն լինելու փաստերը:
Ջազի միջազգային օրը Երևանում անցկացվում է 2012 թ․ ապրիլի 30-ից, երբ ՅՈՒՆԵՍԿՕ-ն ջազի կնքահայր Հերբի Հենկոկի նախաձեռնությամբ ապրիլի 30-ը հռչակեց Ջազի միջազգային օր: Առաջին իսկ տարվանից ջազի միջազգային տոնին միացել է նաև Երևանը, միջոցառումը 9 տարի շարունակ եղել է Երևանի քաղաքապետարանի միջոցառումների ցանկում: Ջազի միջազգային օրն անցկացվել է Երևանի քաղաքապետարանի ֆինանսավորմամբ, իրականացրել է Ջազի հայկական ասոցիացիան: Այս տարի պետք է նշվեր 10-րդ անգամ, ի դեպ, միջոցառումը դեռ կա այդ ցանկում: Ջազի միջազգային օրը բազմաթիվ ջազ լեգենդներ են եկել Երևան` բաս-կիթառահար Ռիչարդ Բոնանը, սաքսոֆոնահար Չիկո Ֆրիմանը, «Գրեմմիի» քառակի դափնեկիր Գոնսալո Ռուբալկաբան, դաշնակահար, կոմպոզիտոր Սերգեյ Մանուկյանը: Ջազի միջազգային օրը Երևանում տոն դարձնելու հանգամանքը նկատել են նույնիսկ ՅՈՒՆԵՍԿՕ-ի ջազի գրասենյակում: Ղեկավար Հերբի Հենկոկի կողմից շնորհակալական նամակ են ուղարկել Ջազի հայկական ասոցիացիային: Շնորհակալություն են հայտնել, որ Հայաստանը միացել է Ջազի միջազգային օրվան և այդպիսի շուքով է նշում` նպաստելով ջազի տարածմանը:
